Karta lo bai pa minister di hustisia:

Ta bai pone preshon pa atendé k’e polisnan dje iglesia di Orlando Balentina

736

WILLEMSTAD—E asuntu dje iglesia di Apòstel Orlando Balentina lo por haña un rabu largu. Manera ta ampliamente konosí el a keda akusá di a mishi ku 5 mucha i 5 adulto. Loke ku mas ta ser kondena pa e pueblo ta e echo ku un dje damitanan víktima mester a kometé aborto na 6 okashon i ku e tabata duna nan píldoranan pa bebe pa evitá ku nan lo a Sali na estado, konfirmando ku e tabata drumi ku nan sin usa protekshon. P’e akusashonnan aki  el a ser demanda na 18 aña kastigu di prizon pa Fiskal Sra Vicento kende a duna di konosé den su disertashon ku nunka promé el a yega di tende di tatu barbaridat asina aki.  Lokual ku ta hasi e kaso aki mas repudiabel ta e echo ku tin diferente agente polisial ku ta bai e iglesia aki.

Agentenan Polisial:

Entre nan tin agentenan polisial ku puestonan hopi klave den e iglesia di Apòstel Orlando Balentina.  Ta asina ku for di aña pasa 18 di mart e ta detené pendiente pa tratamentu di su kaso ku kontenido kua a kuminsá djarason 14 di yüni. . I ta nèt despues di 16 luna ku el a ser detené su kaso a keda presentá i mester bisa ku komunidat di Kòrsou a keda di shòk ku tur e akusashonnan ku a ser trese pa dilanti di parti Sra Vicento. E pregunta ku hopi ta hasiendo ta, ku ta kon por ta posibel ku e agentenan polisial por a keda ketu tur e tempunan ei. Dia 13 di mart di 2016 tabatin un akshon dilanti dje iglesia.

Engaño:

Esnan ku a bai atendé ku esnan ku a bai manifestá tabata agentenan polisial. Esnan ku a bai akshon tabata kier un enkuentro ku Apòstel Orlando Balentina promé ku el a dirigí su mes na su kongresistanan, pero e agente polisial a duna di konosé na nan ku nan lider no tabata presente, segun informashonnan ku Vigilante ta disponé di dje.  Esnan ku a akshon a keda para ariba ku nan kier papia ku Apòstel Orlando Balentina, pero insistentemente e agente polisial a keda mustra ku e no tei i hasta duna indikashon ku nan lider lo no dirigí palabra na nan den e sirbishi menshoná di 13 di mart di 2016. Segun informashonnan ku Vigilante ta disponé di dje ta asina ku un dje manifestantenan a pone e agente polisial na altura e momentu ei ku e siman ei lo detené Apòstel Orlando Balentina kual enbèrdat a tuma lugá 18 di mart di 2016. Despues ku un dje manifestantenan a pone e agente polisial na altura ku e siman ei lo detené nan lider a keda manera ku ta straño ku esei lo sosodé. promé ku e manifestantenan a bai, nan a bolbe puntra e agente polisial ku si enbèrdat Apòstel Orlando Balentina no tei e kontesta tabata un biaha mas negativo. Despues di risibí e kontesta ku e no tei e manifestantenan a hala kita, pero grandi tabata nan sorpresa na momentu ku nan a ser pone na altura djaluna ku enbèrdat Apòstel Orlando Balentina tabata tei te ku el a hasta dirigí su mes na e kongresistanan den presensia dje propio agentenan polisial, manera kos ku nada no a pasa.

Minister di Hustisia:

Preokupashon serka hopi suidadano ta, kon konfiabel e agentenan polisial aki ta. Den seno di kuerpo polisial nan mes no por komprondé kon por ta posibel ku e agentenan a sigui bai e iglesia aki. Lokual ku a subi riba mesa awor, ta e echo ku os a keda informá ku karta lo bai pa Minister di Hustisia Sr Quincy Girigorie pa por atendé kue  agentenan polisial ku ta bai e iglesia aki. Nos a keda informá ku e grupo preokupá kier pa investigá pa wak si e agentenan polisial aki no tabata sa di nada, miéntras ku tabata sirkulá tur e rumornan di loke ku Apòstel Orlando Balentina tabata hasi. Nan kier pa un team imparsial investigá pa sa ki ròl e polisnan aki por a hunga. Hasta ta asina ku nan kier pa hustisia pèrsigui e agentenan polisial aki si resultá ku nan tabata sa algu, pero nan a keda ketu lagando apòstel Orlando Balentina abusá di entre otro muchanan.

Habitantenan:

Ya ta asina kaba ku habitantenan di Groot Kwartier no kier pa e iglesia aki sigui mas ku nan práktika di religion den nan bario.  Manera ta ampliamente konosí ta asina ku Apòstel Orlando Balentina tin su iglesia den e bario di Groot Kwartier ya pa hopi aña kaba. promé el a bishita Iglesia New Song i tambe House of Worship promé ku el a bai lanta su propio iglesia. El a kuminsá for di nada, ounke Vigilante a ser informá ku tempu ku e tabata den baho mundu ta hopi plaka el a traha plaka. Nos a ser informá ku semper a reina e pregunta ta di unda Apòstel Orlando Balentina por a haña asina tantu plaka pa por a lanta e edifisio ei i tambe invertí den Kanal 24. Nos fuentenan a indiká na Vigilante ku imposibel ku djis e simpel entradanan di deismo i ofrenda risibí por tabata e úniko fuente pa produsí asina hopi plaka pa nan por a lanta e edifisio ku nan tin na Groot Kwartier i tambe hasi invershonnan den Kanal 24 ku nan a kuminsá manehá.  Hasta ta asina ku Apòstel Orlando Balentina ta poseé un boto i ku e tabatin kustumber di hasi biahenan pa India i Hulanda. Pa lokual ta trata e edifisio mes ku nan a transformá den un kompleho luhoso e dudanan ta grandi kon bin nan por a yega na e fondo pa hasi esaki, tal manera ya nos a relatá kaba. E konstrukshon ei ta un di esnan di mas bunita na Kòrsou, pero tin diferente habitante di Groot Kwartier ku no kier pa nan sigui ku nan operashon den nan bario, paso pa nan loke ku ta tumando lugá ei den ta blasfemia di Dios.  Manera ta ampliamente konosí e habitantenan no kier e iglesia aki mas den nan bario.  For di den nos edishon di ayera  Vigilante a mustra riba e echo ku ta asina ku habitantenan dje bario a disidí ku nan ta bai kolekta mas tantu firma ku ta posibel pa presentá e petishon di forma ofisial pa stòp ku operashon dje iglesia aki for di den nan sirkulo . Segun nos a komprondé ta asina ku ayera mes tabatin lidernan ku a bolbe bini huntu pa dilanti i nan a disidí ku nan ta bai drenta akshon, tal manera publiká ayera den Vigilante. Pa nan e loke nan ku Apòstel Orlando Balentina a bin ta hasi ta tacha integridat di Groot Kwartier. Pa nan hinter e asuntu aki tin un mal influensia riba e hóbennan ku ta lanta den e bario di Groot Kwartier.

No mas sirbishi den Groot Kwartier:

Bou di niun kondishon nan no kier pa nan sigui pone nan sirbishi den nan bario, paso pa nan ta blasfemia i no kier pa keda manera ku Groot Kwartier ta sentro di esaki. Nan a reiterá na Vigilante ku si e lidernan di e iglesia di Apòstel Orlando Balentina  no kier tende na bon ku nan lo haña esaki di un otro forma sinti, paso nan ta kla pa pinta mensahe riba murayanan dje iglesia pa manda e señal kla ku nan no kier nan den e bario di Groot Kwartier. Nan a indiká na Vigilante ku ya nan por a tuma nota ku e iglesia ta rondoná pa kámara, pero ku nan lo sa kon hasi nan trabou pa mustra nan ku nan no kier mas den e bario di Groot Kwartier.