Den e kaso unda a bin haña e dama di 81 aña morto den kas

Sentralista kurpa kansá a keda sin manda polis ora dama tabata roga pa asistensia

28374
WILLEMSTAD—- Vigilante a logra di hiba un kombersashon ku miembro di un famia di e dama víktima di 81 aña ku a bin pèrdè su bida di un forma violento den e kas na Seru Machu wikènt siman pasa.

Den e kaso aki Vigilante no ta bai masha den detaye kiko lo a pasa den e kas i tampoko kon a bin topa ku e víktima pa asina no daña e investigashon ku a bin ta kanando den full swing i ketu bai ta pidiendo komunidat pa yuda resolvé e kaso lamentabel aki mas lihé posibel. Vigilante a keda informá ku ta for di un dia anterior a manda polis na e kas na Seru Machu riba e kaminda pa bai Fuik unda a bin topa ku e dama di edat morto den su kas. Tabata for di algu pa 12 di anochi a yama sentral di Polis indikando ku tin algun moveshon dudoso den i banda di e kas.

E sentralista di turno a manda polis na e kas pero e patruya  ku a bai na e kas no a hasi e trabou manera debe ser. A bin komprondé ku e patruya di polis a yega na e kas i tira lus i debí ku no a mira niun moveshon den e kas a opta pa sigui bai. Na niun momento segun e informashon ku Vigilante a haña e polisnan no a baha i kontrolá pafó i tambe den e kas siendo ku ta un dama di edat ta biba den e kas i tin sospecho asta ku ta e dama mes a yama debí ku e tabata sinti hende ta mishi na su bentana.  Tabata den oranan di mardugá a bolbe yama den Sentral di Polis pa bai na e mesun adrès i e biaha aki tabata e habitante víktima mes a yama indikando ku tin hende den su kas. E dama su stèm tabata hopi abou i spanta pero e sentralista ku a atendé e yamada no a manda Polis. Segun nos informante e dama sentralista tabata basta kansa i asta a pega soño den sentralista sin atendé e yamada ku tabata basta urgente i dirigí polis na e kas.

Tabata te den oranan di mainta e sentralista a yama e patruya indikando na nan pa bai na e adrès Seru Machu unda un dama a pidi pa asistensia  E agente polisial ku e sentralista a haña nan liña a splika ku ya 7 or di mainta ta bai bati i ku su warda ta kabando esta e warda di mardugá i pa duna e polisnan ku ta subiendo mainta e melding di e adrès Seru Machu pa nan bai. Tantu e polis ku a baha warda i tambe a sentralista a baha bai kas sin pasa e notisia pa  nan otro koleganan. Esta e sentralista ku ta subi e warda di mainta ni tampoko e polisnan ku ta subiendo no a haña e informashon. Tur e yamadanan aki ta wòrdu graba den sentral di Polis i por a tende klaramente kon e dama víktima tabata pidi pa asistensia den oranan di mardugá pero e sentralista a pega soño.

Tabata den oranan di mèrdia pa atardi ku yu di e señora a bai tira bista riba su mama e la bin tuma nota ku e porta di e kas tabata sera pa despues a pasa den banda di e kas tuma nota ku e bentana di skùif tabata kibra i habri. E yu na su turno a pasa patras di e kas na unda via di e bentana di kamber ku tabata konsistí di shutters e por a tuma nota di su ser kerí na suela den kamber sin ta duna señal di bida mas. E aktuashon laks i nonchalant di e dos sentralistanan ku tabata na warda   a pone ku mando di Kuerpo Polisial a haña nan ta pone ámbos riba non aktif pa asina por kuminsá ku un investigashon. Awor ta spekulando yen pensamentu si e polisnan a baha e mardugá ei na e kas por ta nan lo a haña esnan òf esun ku a bin pa hòrta den e kas òf si nan a bai mainta trempan tambe por a bin topa ku un otro senario. E kaso ta den investigashon.