Segun dama ku ta manehá negoshi e ‘TragoMeid’ nan tei di nan propio boluntat

10171
Sitio unda henter e akontesimentu a tuma lugá.
WILLEMSTAD,– Korte den promé instansia a trata un kaso ayera unda ta sospechá vários persona di ta kómplise di trafikashon di hende.Esaki despues ku entre 6 pa 15 di òktober aña pasá W. La Reine, A. Sintiago i R. La Reine tabata esunnan ku ta responsabel pa trafikashon di e dama di fam Camacho. Tur esaki despues e dama di fam Camacho ku a bin hospedá serka W. La Reine i A. Sintiago, mester a keda gañá pa e pareha ku a bisé ku lo e mester bin Kòrsou pa traha den kushina i parti di limpiesa.

Tabata despues e dama a yega Kòrsou ku a notifik’é ku ta komo ‘tragomeid’ lo e mester bin traha. E dama a rabia na e okashon aki unda el a buska manera pa bai entrega keho kontra di e doñonan di e negoshi.Na e okashon aki e dama a bai warda di polis ku e 2 agentenan polisial Winklaar i Pietersz. Tabata despues ku e dama a bai ku e polisnan, ku W. La Reine mester a yama su primu ku ta polis kende ta R. La Reine, pa asina duna un keho di sekuestro.Nan a yama tanta di e víktima unda a menas’é bisando e ku e mester bin na Bandera Grill, unda tambe a lag’é papia ku e polis ku a bisé ki ora lo e yega pa atendé e kaso. Tabata na momentu ku e primunan La Reine mester a bai duna keho na polis, ku a detené tur e sospechosonan.Nan a keda detené 4 di novèmber aña pasá riba e kaso aki. Segun e dama di fam Sintiago ku niun di e dama no a bin Kòrsou ku intenshon di traha komo ‘tragomeid’. El a sigui bisa ku e no tabatin niun dil ku Camacho, pero el a haña e víktima riba dje. Mas aleu el a bisa ku e víktima no a bin Kòrsou pa traha, pero ta un mener a presentá kuné pa e traha tanten.

E dama di fam Sintiago a bisa ku e ta inosente i ku tin su outo den konfiská pa basta dia sin ku e sa pa kiko, miéntras tambe e tin kasi un aña ta hür outo. Fiskal mr. Vicento ta haña e hòmber i tambe dama kulpabel di trafikashon di hende, miéntras e polis R. La Reine ta kómplise di esaki.El a hasi petishon di 6 luna kondishonal pa W. La Reine, miéntras e dama Sintiago a pidi 3 luna di kastigu kondishonal i e polis La Reine a pidi 6 luna kondishonal di kastigu i ku pa 2 aña e no mag fungi komo polis. Tambe e dama víktima a pidi 50 mil florin komo daño perhuisio.Tur e petishonnan di kastigu aki a keda kompaña pa 2 aña di prueba. Abogadonan di e sospechosonan kende ta mr. Prevo i mr. Eisden a pidi libertat pa nan klientenan, mirando ku segun nan no tin prueba sufisiente pa kulpa nan di trafikashon di hende.Segun e abogadonan ta nan klientenan ta víktima i no e dama Camacho. 20 di òktober próksimo pa mitar di 9 di mainta lo dikta sentensia den e kaso aki.