Na Portugal

Muhé lo bai duna lus na su nietu

12672
E lei a keda aprobá resientemente na Portugal.
LISBOA — Un muhé lo bai duna lus na su nietu i esaki lo ta e promé kaso outorisá di e fenómeno konosí na spañó komo ‘vientre de alquiler’ na Portugal. Aki ta unda resientemente e lei nobo relashoná ku esaki a drenta na vigor.

E muhé, di 49 aña, a pone su kurpa na disposishon ya asina su yu muhé, kende tin problema pa sali na estado, por konbertí su mes den mama.

E lei 92/2017, na vigor for di 1 di sèptèmber último, ta establesé ku pa ousensia di un òf otro órgano, leshon òf imposibilidat di embaraso di un hende muhé, esaki lo por solisitá un otro hende muhé pa karga e beibi. Esaki basta ku nan kumpli ku otro rekisitonan.

E presidente di Konseho Nashonal di Prokreashon Medisinalmente Asistí, a splika ku den e kaso aki, e wela lo no ta e mama biológiko, aunke ku e ta esun ku lo karga e beibi. Esaki pa motibu ku e fundashon ta keda realisá ku spèrma di e tata i partinan di e mama.

E lei nobo aprobá na Portugal aki, ta impedí ku e gestashon por keda hasí ku material biológiko di e muhé ku lo bai karg’é. Pues esaki ta pone ku e beibi lo tin òf material genétiko di su tata.

Ademas esun ku aseptá di karga e beibi nunka lo no por reklamá ningun tipo di derecho riba e beibi na un tribunal, ya ku esaki lo no ta su yu biológiko.

Un di e solisitutnan risibí tabata na e parti sùit di Spaña, un pareha ku ta biba na frontera i ku e muhé ta sufri problemanan di salú i no por sali na estado. Den kaso ku e hasi esaki tòg,  lo pone su propio bida na peliger.