Polis a lag’é bai el a bolbe bai hòrtá su tata.....

Yu hòmber a hòrta 4400 florin for di su tata

8720
WILLEMSTAD,– Ayera tabatin tratamentu di un kaso unda e hóben S.W. di 16 aña, ku mester a hòrta plaka kèsh for di su tata.Esaki a tuma lugá entre 1 i 20 febrüari tras di lomba. E hóben su so òf kompañá, mester a uza yabi falsu pa hòrta kaha fuerte for di su tata su kas, pa asina bai habrié esaki pa kue sèn ku tabatin aden. E sospechoso kende su telefòn a keda konfiská, a keda gará na momentu ku e tabata papia via telefòn tokante baimentu di  ‘bungalo’, hür outo i tambe di e ladronisia.

E hóben mes a atmití ku el a hòrta sèn di su tata, di kual el a asta bisa ku el a kumpra telefòn ku e sèn. Wes a bisa e kliente di abogado mr. Alejandra ku e no sa ku su tata ta traha duru pa su kosnan, unda e hóben no tabatin kontesta. E sospechoso ta bibando ku su wela, pa motibu ku su mama ta na Hulanda aktualmente pa situashon di salú.S.W. a bisa ku e no sa kiko e bisa, ku e no sa dikon el a bai kometé e akto aki. Mas aleu el a bisa ku e no ta adikto na droga i ku e no ta uza esaki. El a deklará esaki despues ku a bisa ku e hóben mester bai FMA.

Tabata despues ku a laga e sospechoso bai pa e kaso aki, ku el a bolbe bai hòrta sèn di su tata. Segun wes si e hóben ta sigui hòrta i ta mustra ku e no tin remordimentu, lo a haña kastigu haltu pa loke e ta hasiendo. E kliente di mr. Alejandra a asta atmití ku ta 2 biaha el a hòrta sèn di su tata. Segun fiskal mr. Vicento por proba ku e hóben aki a hòrta su tata, miéntras e mes a aseptá esaki. Tambe el a bisa ku e hóben a atmití di a uza yabi falsu pa fasilitá su trabou. Mr. Vicento a bisa ku e no ta mira nada di remordimentu na e sospechoso, miéntras lo e bai pidi pa e sospechoso bai skol i tambe bai un sikólogo.

Segun fiskal e hóben a bisa ku e no mester di yudansa pa stòp hòrta, pero e si ta haña ku e sospechoso mester di guia. Pa esaki el a pidi 2 luna di kastigu kondishonal pa e hóben, ku bishita di sikólogo,  guia di FMA, guia di reklassering i  ku e mester bai skol.Aparte di esaki e hóben lo mester traha boluntariamente 80 ora i sigui un lès 18 ora. Tur esaki ku un temporada di prueba di 2 aña. Wes mr. Paulides na su turno a sentensiá e sospechoso na 41 dia di prizòn di kual 30 ta kondishonal, ku 2 aña di prueba. Tambe e hóben lo mester sigui guia, traha 80 ora komo kastigu i sigui un lès tambe komo kastigu pa 18 ora. Si e no hasi esakinan lo e haña 49 dia di detenshon hubenil.