Franses detené pa sospecho di ‘Skimming i Harvesting’.

1657
E sospechoso di Fransia ku a keda arestá ku basta plaka i tambe vários karchi  di banko den su poder.
Willemstad—-Djaluna 9 òktober 2017, alrededor di 10.28 or, polis a para un vehíkulo riba Roosveltweg despues di a risibí informashon ku e shofùr for di ayera ta lanta plaka for di un ATM ku vários karchi di banko. Djaluna  tambe e shofùr di e vehíkulo tabata lanta plaka na mes un ATM.

Durante un investigashon ku polis a hasi, a haña plaka kèsh i un kantidat di diferente karchi di banko den saku di e shofùr di outo aki. Polis a konfiská tantu e karchinan i e plaka kèsh pa mas investigashon. Relashoná ku esaki polis a detené e hòmber sospechoso aki, A.E. di 28 aña di edat, nasé na Fransia. A presentá e sospechoso aki, dilanti di un Fiskal Ouksiliar ku a ordená su enkarselamentu pendiente di mas investigashon.