Nan ta pone hopi énfasis riba e benefisionan pa e pueblo:

Pa Guandong Zhenrong tur dos parti mester sali gana for di e proyekto

51
Chen Bingyan: Esaki tabata e momentu históriko na momentu ku e direktor di Guandong Zhenrong a basha  firma na 2016.
WILLEMSTAD—For di un prinsipio tabatin duda pa ku e kapasidat finansiero di Guandong Zhenrong.  Pa evitá konfushon i trese konfiansa pa ku Kòrsou nan a indiká ku nan a introdusí  CCIEE  ku ta un kompania ku tambe ta pertenesé na gobièrnu chines i kua ta rankea na di 24 lugá den e top 500 nan di mundu.  Ta trata akinan di un kompania  ku un base finansiero hopi sólido ku lo ta partner di Guandong Zhenrong den e proyekto ku nan ta bai tin aki na Kòrsou. E moveshon aki di Guandong Zhenrong ta pa  krea i fortifiká e konfiansa den nos hendenan, nan a sigui indiká mas aleu. 

Guandong Zhenrong a indiká ku nan a bin Kòrsou  ku entusiasmo pa establesé un eksitoso modelo di  negoshi di koperashon ku gobièrnu di Kòrsou i su  poblashon.  Guandong Zhenrong a mustra riba  echo ku e bon sistema di nos  lei, hospitalidat i honestidat di nos hendenan ta loke ku a trese nan Kòrsou. E echo ku tur dos parti mester sali gana  no ta djis un slogan di nan, pero algu ku nan ta para su tras di hinter nan kurason.

Tambe nan a indiká ku meskos ku un Kòrsou próspero ta nos soño ku esaki ta nan ophetivo tambe, segun  Sr Chen Bingyan kende ta direktor di Guandong Zhenrong a trese pa dilanti.  I pa Guandong Zhenrong por midi nan riba e plan di HoA (Heads of Agreement)  i addendum plan alternativo di HoA kua semper  ta pone e benefisio dje poblashon i futuro di Kòrsou komo  ophetivo primario.  Na final Sr Chen Bingyan ta duna di konosé ku si tur nanishi ta den mesun direkshon ku e proyekto aki lo ta unu eksitoso.