Willemstad—-Ya for di ayera Vigilante a skibi ku e Plan B ku tin riba mesa ta paro General.  Esaki ta hustamente lokual ku a keda anunsiá ayera den e  rueda di prensa konvoka na sede di PWFC.

Sr Errol Cova den e rueda di prensa a hasi ofisial e anunsio ku entrante awe 7:00 or di mainta nan ta warda tur hende na parke Alameda pa lokual ta trata e Paro General.  Diferente dje lidernan sindikal a hasi apelashon na nan miembronan pa nan akudí na parke Alameda. Esnan ku a hasi e mesun apelashon tabata SITKOM, STRAF, SEU, APRI, STO, PWFC i BTG. Lokual ku tabata notabel ayera si ta e echo ku ABVO no tabata presente. Pa lokual ta trata ousensia di ABVO ta asina ku Sr Errol Cova no a duna masha importansia na esaki indikando ku kada sindikato ta responsabel pa nan akto. Sr Marco Lacle a duna di konosé ku nan komo sindikato SAP ta sostené e lucha, pero el a hasi apelashon na Kuerpo Polisial pa nan kòrda kiko nan ta siña na skol i kon aktua den sierto situashonnan. El a hasi apelashon na mando polisial pa nan manda polisnan eksperensia kaya. Tambe el a dirigí na e wèlguistanan pa nan tampoko no provoká. Durante dje rueda di prensa Sr Errol Cova a trese pa dilanti ku e ta rekomendá pa no manda muchanan skol awe. El a hasi apelashon na e mayornan pa no manda e muchanan na skol i na trahadónan el a hasi un súplika na nan pa nan akudí awe na Parke Alameda. El a  splika tambe ku niun doño di trabou no por tuma represaya kontra niun trahadó, paso nan a disidí na akudí na Parke Alameda. El a rekordá e trahadónan ku disidí na wèlga ku lo máksimo ku e doñonan di trabou por hasi ta kita e sèn ku nan no a traha, pero no ku por tuma medida kontra di nan manera por ehèmpel kita nan for di trabou.