WILLEMSTAD—E sindikatonan a uni i disidí na pone un preshon formal riba Gabinete Rhuggenaath. Esnan ku a uni ta SITKOM, BTG, STRAF, APRI, HIWA, SEU,  PWFC, SAP, STSK, STO, SGTK, STK, STKO, ABVO, CBV i SSK.

Ayera mainta e sindikatonan a reuní riba Parke Alameda promé ku nan a bai Forti pa a entrega Premier Sr Eugenne Rhuggenaath e karta den kua nan a mustra ku nan kier pa baha e 3 puntonan for di riba mesa kua ta  retiro dje 280 trahadónan di UTS, oumento di seguro di outo i pa subi salario mínimo. Nan ta kier pa Gabinete Rhuggenaath a baha esakinan for di riba mesa di moda ku nan por aseptá dje forma ei pa start ku un diálogo. E entrega dje karta a ser hasi pa Sr Errol Cova na Forti pendiente pa un kontesta 11:00 or di mainta. Ta asina ku eksaktamente 11:00 or di mainta Premier Sr Eugenne Rhuggenaath a respondé indikando ku lokual ku nan lo duna apertura na dje ta un diálogo nashonal respetando e akuerdonan di ILO. Despues ku sr Errol Cova a lesa e karta el a duna di konosé ku loke ku nan a risibí komo kontesta ta fofo invitando prensa pa akudí 7:00 or di anochi na sede di PWFC pa asina anunsiá kiko ta e Plan B.