WILLEMSTAD—Ayera tabata e promé dia pa lokual ta trata e Paro General sostené pa 15 sindikato. E Paro General di ayera a kuminsá 7:00 or di mainta na Parke Alameda.

Ta asina ku na momentu ku e sindikatonan tabata ei bou a disidí na pidi un reunion ku premier Sr Eugenne Rhuggenaath. Manera ta konosí djamars anochi Gabinete Rhuggenaath a anunsiá ku nan a papia ku e aseguradonan i akordá ku nan ku ta wanta ku kobransa dje prima èkstra di 13.5%. Tambe mesun dia Gabinete Rhuggenaath a anunsiá ku entrante  1 di yanüari 2018 a disidí na subi salario mínimo ku 17.5 sèn pa ora. Relashoná ku e 2 akshonnan aki di parti Gabinete Rhuggenaath nos a publiká ayera un deklarashon di Sr Errol Cova kende a konsiderá hinter e asuntu aki igual ku uso di bakoba pa kue makaku. Ayera mainta Sr Errol Cova a pidi Premier Sr Eugenne Rhuggenaath un reunion pa a trata e puntonan ku a bin riba mesa. El a sali di Parke Alameda bai reuní ku Sr Eugenne Rhuggenaath. Mester bisa dado momentu e grupo na Alameda a sinti ku e reunion aki tabata durando largu i un parti di esaki nan a disidí na bai direkshon di Fòrti pa bisa Sr Errol Cova i sobra lidernan sindikal pa bandoná e reunion ku Premier Sr Eugenne Rhuggenaath. Na bos duru nan tabata grita e nòmber di Sr Errol Cova pa sali afó. Na momentu ku Sr Errol Cova a sali pafó el a dirigí su mes na esnan presente den Parke Alameda i mustra riba e echo ku tur kos a keda igual i ku komo tal e Paro General ku ta forma parti di Plan B ta sigui normal. Sr Fransley Sillie kende ta presidente di BTG i Sr Errol Bishop  di SEU a duna di konosé bon kla ku awor nan ta mas determiná ku e lucha i ku nan ta bai te final ku esaki. Un dje strategianan ku a keda apliká ayera tabata di traha 2 grupo pa kana den kayanan di Punda i duna informashon na e trahadónan di Pakus. E grupo a keda  repartí den un enkabesá pa Sr Fransley Sillie, miéntras esun otro pa Sr Giovanny de Caster di STO. Den gruponan separá nan a kana i duna informashon na e trahadónan manera ya nos a mustra riba dje. Den oranan di anochi e unidat sindikal a bin huntu atrobe i mester bisa ku lokual ku a keda akordá ta ku awe mainta ta spera tur hende na sede di PWFC. Segun informashonnan ku nos ta disponé di dje ta asina ku lokual ku lo por bin riba mesa awe ta Plan C. Relashoná ku e parti aki nos a drenta den kontakto ku Sr Errol Cova kende no kier a bai den detaye pa lokual ta trata Plan C. Lokual ku Vigilante por a saka afó ku Plan C ta bai subi mesa. Tur lokual ku e kier pa tur hende hasi awe ta bini na sede di PWFC. El a indiká na nos ku esaki ta un apelashon di parti tur e sindikatonan ku ta sosteniendo e lucha aki.    Redakshon di Vigilante ta siguiendo tur e desaroyonan di aserka pa por mantené nos lektornan debidamente bon informá.