Fer a leshoná miéntras Janga i Brenet a anotá i Bacuna ku outogol

Nos futbolistanan djasabra último den eksterior....

119
Momentu ku dunando Leroy Fer (8), promé asistensia riba tereno di wega.
WILLEMSTAD—Durante di e fin di siman tras di lomba, nos diferente futbolistanan ku ta militá den eksterior, un biaha mas tabatin kompromisonan ku nan respektivo ekiponan. Un ke otro, unda entre otro Leroy Fer a leshoná i lo no por hunga mas e temporada aki, Rangelo Janga i Joshua Brenet a logra pa anotá pa nan respektivo ekiponan, miéntras ku Leandro Bacuna a anotá un outogol.

 

Kosnan a bai di e siguiente manera ku ‘nos muchanan’ djasabra tras di lomba:

Leroy Fer leshoná

E mediokampista di Swansea City den Premier League na Inglatera a inisiá i a hunga apénas 36 minüt, promé di a bandoná tereno di wega leshoná. Esaki unda e la sker su ‘achillespees’, den wega ku nan a empatá 1-1 ku Leicester City. E wega a hunga den stadion King Power, dilanti 31.179 fanátiko. E promé mitar a transkurí ku e ekipo di Fer atras ku skor mínimo.

 

 ‘Cuco’ Martina ku pase di gol

Kapitan di nos selekshon nashonal di futbòl ‘Cuco’ Martina a hunga kompletu pa Everton, den stadion Emirates, ku presensia di 59.306 fanátiko. Tabata den wega di Premier League na Inglatera, ora nan a topa Arsenal i sufri derota pa goliada ku skor di 5-1. E promé mitar a transkurí ku Everton atras 4-0. Na di 64 minüt, Martina ta hasi un pase, via un kruse, pa asina fasilitá un kompañero di ekipo pa anotá i deskontá, salbando honor pa su ekipo.

Rangelo Janga a drenta i anotá

E atakante Rangelo Janga ku awor ta den futbòl na Bèlgika, mirando akshon pa Gent den First Division A, a hunga durante di e 26 minütnan final pa su ekipo, despues di inisiá komo suplente i anotá den pitu. Su gol tabata faltando 1 minüt pa e pitaso final, ora ku nan tabata atras den Kehrwegstadion i asina a logra pa optené 1 punto, kontra di e ekipo di Eupen.

Rangelo Janga (man drechi) selebrando despues di su gol pa e empate den pitu.

 

Vurnon Anita no a hunga

Vurnon Anita tabata na banki pa Leeds United den Championship ingles, pero no a hunga, den wega ku nan a topa Cardiff City i a kai vensí 4-1, despues di tabata atras 3-0 na sosiegu. Tabata enkuentro ku a mira akshon den stadion Elland Road.

Leandro Bacuna ku outogol

Leandro Bacuna, kende tambe ta parti di nos selekshon nashonal di futbòl, a hunga kompletu pa Reading den wega tambe a Championship di futbòl ingles. Nan a topa Millwall na kas i a kai vensí ku skor di 2-0, despues ku e ekiponan a tèrminá promé mitar sin konosé gol. Stadion Madejski, ku 17.282 fanátiko presente a mira Bacuna hunga kompletu, unda e la anotá un outogol na minüt 70, pa su ekipo kai atras 1-0 i tambe a risibí un karchi hel faltando 6 minüt pa e pitaso final. Ku e resultado aki, e tékniko di su ekipo, Jaap Stam, eks futbolista di entre otro PSV, Ajax, Manchester United, AC Milan i selekshon Oraño, lo por ta na kareda. E ekipo ta den peliger pa degradashon, na di 18 puesto, despues ku temporada pasa inkluso nan tabata den lucha pa alkansá Premier League. Den nan último 10 kompromisonan, e ekipo di Leandro a logra solamente un viktoria.

Gevaro Nepomuceno i Zeus de la Paz na banki

E duo formá pa e mediokampista Gevaro Nepomuceno i kiper Zeus de la Paz, tabata na banki i no a mira akshon pa nan ekipo Oldham Athletic. Esaki den wega ku nan ekipo a gana di Bradford City 2-1 dilanti di 5.526 fanátiko den stadion SportsDirect.com Park. Tabata den wega bálido pa futbòl na Inglatera, pa loke ta League 1.

Joshua Brenet ku un gol i un pase di gol

Joshua Brenet a hunga kompletu pa PSV den Eredivisie na Hulanda, den wega ku nan a golia PEC, hungando na kas den stadion Philips 4-0. 32.800 fanátiko tabata presente i a mira kon Joshua Brenet a anotá na di 79 minüt di wega, pa pone e skor final 4-0. Esaki despues ku tambe e tabatin un pase di gol, pa pone e enkuentro 3-0 na minüt 72. Kiper Eloy Room i e hóben defensor Armando Obispo, tabata na banki i nan no a logra pa mira akshon pa PSV.

Joshua Brenet den akshon den wega unda e la anota un gol i tabatin un pase pa otro gol pa PSV gana 4-0.

Brandley Kuwas i ‘Sontje’ Hooi a hasi kos di ruman

Brandley Kuwas a hunga kompletu pa Heracles, miéntras ku Elson ‘Sontje’ Hooi a inisiá pa ADO Den Haag i keda remplasá na minüt 59, den wega ku nan a empatá na 1 gol. Stadion Polman ku asistensia di 10.127 fanátiko tabata esenario pa e enkuentro ku a alkansá sosiegu ku ‘Sontje’ den bentaha. KU e resultado aki, ainda e ekipo di Kuwas no a logra triunfo den 2018 i tin 5 wega konsekutivo sin por logra 3 punto.

1 punto pa ekipo di ‘Cheese’ Carmelia i Gillian Justiana

Gillian Justiana a hunga kompletu, miéntras ku Shanon ‘Cheese’ Carmelia tabata komo suplente i no a mira akshon, den wega ku Ijssselmeervogels a logra 1 punto. Nan a hunga na kas dilanti un públiko di 1.580 fanátiko i a empatá na 1 gol ku e ekipo di GVVV. E gol di Ijsselmeervogels, tabata for di un tiru penal, despues di un infrakshon, unda a pone Justiana na suela durante di un atake. Ousensia di ‘Cheese’ ta debí na un konflikto entre su persona i e tékniko, ku dirigentenan ya tin atenshon p’e.

Hugada unda Justiana ta drentando área penal i seguidamente keda tumbá, ku ta bira un tiru penal.