Un vehíkulo tambe a keda konfiská

 Tres stranhero arestá den kaso di asesinato riba Rooseveltweg

449
Willemstad—–Djadumingu 4 febrüari 2018, alrededor di 23.55 or, Sentral di Polis a haña notifikashon di un kaso di tiramentu i hinkamentu ku a tuma lugá riba F.D. Rooseveltweg.

E patruya polisial ku a yega na e sitio a topa ku un hòmber drumí abou ku no tabata duna señal di bida. Un tiki mas leu na e sitio polis a topa ku un otro hòmber drumi abou ku kap na kabes i tabata sangra profusamente. For di un investigashon ku polis a hasi na e sitio a resultá ku algun hòmber tabatin problema ku otro. Dado momentu un di e hòmbernan aki a saka un arma di kandela i a lòs bala dirigí riba e hòmber víktima. Bala a alkansá e víktima na e parti ariba di su kurpa i na su pia. Alrededor di 00.50 or dòkter di polis a konstatá morto di e víktima di tiroteo, Marco Fidel Cervantes Castro, nasé na Colombia, 6 yüni 1974.

Ambulans a transportá e hòmber ku tabatin un kap grandi na su kabes J.A.R.H.-ku personanan na e sitio a agredí- i ku probablemente ta e un di e sospechosonan pa poliklínika di SEHOS pa tratamentu médiko i e la keda interná den St. Elisabeth Hospital.

Na e sitio polis a haña i konfiská “huls” i diferente otro opheto/artíkulo ku ta di importansia pa e investigashon. E motibu eksakto di e tiroteo aki ta den investigashon. Pero segun informashon ku Vigilante ta disponé di dje ku e víktima ku a ser asesiná a trata di bai intermediá den un problema ku a surgi entre e sospechoso Venezolano i mas hende. E sospechoso Venezolano a bai outo kue un arma di kandela i a los for di un distansha dos tiru riba e víktima ku a alkanse mortalmente. Tabata despues di esaki e la kore pa trata di drenta den e vehíkulo ku a ser konfiská ayera ku tabata stashoná na un distansha pero no a logra ya ku personanan ku tabata presente na e sitio mester a logra kue tene bah’é for di e vehíkulo i a maltrat’é i asta hink’é.

Mas lat dos(2) otro hòmber a bini na e sitio i a deklará ku nan tambe ta heridá. Ambulans ku tabata na e sitio a duna nan promé asistensia. Kontinuando ku e investigashon den e kaso aki, ayera djaluna 5 febrüari 2018 alrededor di 09.30 or polis a detené e sospechoso ku tabata interná den hospital:

J.A.R.H., nasé na Venezuela, 23 aña di edat

Kontinuando ku e investigashon di tiramentu ku a tuma lugá awe den oranan di mardugá 5 febrüari 2018 riba tereno di un establesimentu situá riba Rooseveltweg, kaminda un persona a pèrdè su bida, personal di Divishon di Krímen Organisá konhuntamente ku e Team di Aresto a tene un entrada hudisial awe mainta na un kas den área di Montaña Abou. Durante di e investigashon den e kas polis a konfiská un arma di kandela, algun telefòn selular i tambe un outo Kia Picanto ku probablemente ta envolví den e tiramentu.

En konekshon ku esaki polis a detené e hòmber sospechoso:

R.R.G.B.,nasé na Ecuador, 37 aña di edat komo sospechoso den e kaso di tiroteo i tambe Lei di Arma.

Na e kas polis a detené tres (3) persona di nashonalidat Venesolano i Ekuatoriano ku no tabatin e dokumentunan nesesario pa por permanesé riba nos isla. Nan a keda transladá pa Departamento di Imigrashon ku a keda enkargá ku e investigashon i deportashon.

 A presentá e sospechoso R.R.G.B.. dilanti un fiskal ouksiliar ku a ordená su enkarselamentu pendiente di mas investigashon. Kontinuando ku e investigashon di e tiramentu aki, e tim investigativo a detené un hòmber sospechoso mas:

A.A.L.C., nasé na Venezuela, 24 aña di edat komo ko-sospechoso den e kaso di tiroteo aki.

Response Team a detené e sospechoso aki ayera  mainta tempran den área di Saliña. E hòmber aki no tabata tin e dokumentunan nesesario pa por permanesé riba nos isla. A presentá e sospechoso A.A.L.C. dilanti un fiskal ouksiliar ku a ordená su enkarselamentu pendiente di mas investigashon. E investigashon den e kaso aki ta kontinuá.