Alumno di Marnix F.O. ta turista na nan mes skol

239
Willemstad – Ku nan pasport den man alumnonan di Marnix F.O. na Rio Canario, por a bishitá ocho (8) diferente pais di Suramérika den nan kura di skol.

Anualmente dosente i gerensia di Marnixschool ta risibí ku brasa habrí e proyekto “Wereldlandendag”. E proyekto akí ta un inisiativa di e komishon di mayor i tin komo meta pa kada aña eskolar, durante di un siman, duna e alumnonan e oportunidat pa
sera konosí ku un otro pais. Di e forma akí amplia nan konosementu tokante entre otro kultura, historia, bandera, kustumber i kuminda di otro pais.

Pa algun aña e proyekto akí tabata un éksito i e aña akí no tabata un eksepshon. Durante henter e siman dosentenan a krea espasio pa siña e alumnonan tokante diferente tema mará na un pais spesífiko. E aña akí kada grupo (klas) a konsentrá riba un pais di Suramérika manera: Argentina (den grupo 8), Brasil (den grupo 3), Perú (den grupo 6), Colombia (den grupo 7), i Venezuela (den grupo 2). Paisnan mas chikitu manera Uruguay (den grupo 1), Ecuador (den grupo 4) i Frans-Guyana (den grupo 5) tambe a haña atenshon.

Kada klas ku su propio estilo a duna kontenido na e siman temátiko akí. Por ehèmpel den grupo a traha riba diferente tarea, buska informashon i inkluso traha relato tokante e pais en kuestion. Huntu ku esaki e muchanan a traha diferente obra di man.

Djabièrnè a sera e proyekto akí ku presentashon, di tur loke a siñá i trahá durante di e siman, na sobra alumno i dosente. E alumnonan ku nan pasport den man, por a bishitá e otro klasnan, i akí risibí den nan pasport un stèmpel komo prueba di nan bishita na e pais. Asina alumnonan di Marnix F.O. por tabata turista den nan mes kurá di skol. Mayor i wela tambe por a partisipá for di 11’or di mainta na e djabièrnè di eksposishon akí i atmirá tur loke e alumnonan a traha.