Kuater frakshon a pidi reunion públiko urgente pa trata invashon di Hulanda na Sint Eustatius

Premirando ku próksimo víktima por ta Kòrsou:

3711
WILLEMSTAD—No ménos ku kuater frakshon a bati na porta di Staten pa pidi reunion públiko relashoná ku e situashon na Sint Eustatius.

Tópiko ta petishon pa reunion públiko ku karakter urgente tokante di e atropeo di Gobièrnu Hulandes riba e pueblo humilde di St. Eustatius. Nan a dirigí e karta na Sr William Millerson kende poniendo e na altura ku konforme artíkulo 64 di reglamentu di òrdu nos ta yama e reunion públiko aki ku karakter di urgensia pa diskutí i fiha posishon riba e atropeo di Gobièrnu Hulandes riba e pueblo humilde di St. Eustatius, dor di intervení di forma diktatorial poniendo un gobièrnu legítimamente i demokrátikamente eskohí un banda. General Aseambly Resolution 742, artíkulo 73 UN Charter, Resolushonnan 1514, 1541 di e karta magna di Nashonnan Uní ta papia palabra kla. Ta un pueblo ta rigi su propio destino.  No un Kolonisador Diktatorial manera Hulanda. Ku e akshon nan aki Gobernashon Hulandes ta kere ku e por pone e pueblo di St. Eustatius doblegá i enbes di buta un komisario Hulandes, ta buska yu di Kòrsou ku ta dispuesto di bringa nan Guera pa nan. Asina e Gobiernu Hulandes a kuminsá na Aruba, siguí pa St. Maarten, awor ta St. Eustatius i Kòrsou lo no skapa si nos no manda un señal ku aki sí, no ta akseptá intervenshon Hulandes òf un Gobièrnu ku ta habri porta pa Hulanda haña mas i mas di bisa dor di hiba un mal maneho konsientemente.  Nos ta urgí Presidente di Parlamento pa organisá e reunion públiko aki ku karakter di urgensia, pa asina Parlamento debatí i fiha posishon riba e tema spesífiko di St. Eustatius. E kuater frakshonnan ku ta sostené e reunion públiko aki ta MFK, Kòrsou di Nos Tur, Pueblo Soberano i Movementu Progresivo.