Abogado Figaroa: Un sindicato no tey solamente pa negocia un CAO

82
ORANJESTAD,–Hose Figaroa cu ta abogado di FTA tabata presente den e conferencia di prensa di e sindicato pa elabora riba e referendum cu lo wordo teni bou empleadonan di banco CMB dia prome di mart awor.

E Abogado a bisa cu nan tin e impresion cu banco ta pushando hopi pa tene FTA afo y kier crea un sindicato interno. Ta parce cu Banco a bini cu e proposicion na e trahadonan cu ta bay crea un Employee Council, cu ta manera un sindicato interno via cual e trahadonan por trece nan opinion dilanti pa e compania. Esaki sin cu mester tin un sindicato externo envolvi. FTA ta mira esaki como un tactica pa simplemente mantene un sindicato afo di e banco.

Internacionalmente e tipo di sindicatonan aki ta wordo yama “Yellow Unions” cu lo mester ta independiente pero ta wordo fuertemente influencia door di gerencia di e compania. Di experencia e sa cu e co aki lo no funciona. E idea di un sindicato ta cu e mester ta independiente y e tipo di organonan manera e banco ta propone, gran mayoria di nan ta wordo influencia fuertement. Ademas, tin un aspecto legal cu ta stroba e tipo di organisacionnan aki di funciona debidamente, y esaki ta cu na Aruba ley ta bisa cu e uniconan cu tin autoridad pa cera un contracto colectivo ta un sindicato, unda cu esaki ta wordo specifica den su Statuutnan.

Un CAO ta wordo regla pa ley, tur loke nan por regla den un acuerdo asina aki. Y e empresa na final ta mara na loke cu wordo regla den un CAO. E acuerdo mester conta pa tur trahado cu ta cay bou di e regla aki y ademas ley ta bisa cu tur e condicionnan den e CAO ta aplicabel pa tur futuro trahadonan tambe. Ley ta bisa tambe cu un CAO no por wordo firma pa un temporada mas largo cu cinco aña. Periodicamente mester negocia un CAO y cu tempo por adapta cierto puntonan, den cual ta obliga pa ley, p.e. ora di inflacion.

El a recorda cu un CAO ta aplicabel pa tur hende y no tin regla scondi.

E sindicato no solamente ta negocia un CAO, pero ora cu tin problema na pia di trabaou, e sindicato por yuda cu asistencia legal. E ta bay hopi mas leu cu negocia un CAO. Esaki ta puntonan, e Abogado a bisa, mester ta hopi cla pa e trahado. El a recorda como trahado individual, no ta haci influencia grandi. Pero cu apoyo di sindicato nan por logra hopi mas. Mira so loke a causa cu nan afiliacion na FTA. E banco a dicidi di hala atras riba e medidanan cu a wordo tuma den luna di november.