E ekipo Evolve kampion kategoria ‘D4 X Ball’ na Panama

Den e kampionato ‘507 Paintball League’

103
E ekipo Evolve ku a resultá kampion kategoria ‘D4 X Ball’ na Panama.
PANAMA – E ekipo di ‘paintball’, Evolve, ku den siman tras di lomba a sali rumbo pa Panama, unda nan a kompetí den e ‘507 Paintball League’, a logra e título máksimo.

E ekipo di Evolve ku su miembronan Christopher Abraham, Ray Mahara, John Gibson, Charles ‘Charley’ Lew Jen Tai i Dinyor Antonia, a sa di titulá kampion den e kategoria ‘D4 X-Ball’ (8 minüt). Manera nos a publiká anteriormente, e evento aki a tuma lugá den e ‘Panama Paintball Club’ ku ta situá na Hotel Riande Aeropuerto, na Tocumen.

E kampionato aki a konta ku 3 diferente modulo di kompetensia kual nan ta e ‘D5 Five men’ (5 minüt), ‘D4 X-Ball’ (8 minüt) i e ‘D3 X ball’(10 minüt). Tabata den e final di e kategoria ‘D4 X-Ball’ (8 minüt) ku e ekipo di Evolve ta enfrenta e ekipo PK Crewi ta gana ku skor di 3-0. Nos di deporte vigilante ke yama e ekipo di Evolve un pabien ku nan logro.

Mester remarká ademas ku den e kategoria ‘D3 X ball’(10 minüt), tabata e ekipo di Aruba, Chronic Chaos, ku tambe ta sa di titulá kampion. Un pabien na e ekipo Chronic Chaos di Aruba tambe ku nan logro.