Derecho di compositornan tambe mester respeta

Maybelline Arends Croes:

127
ORANJESTAD(AAN):Un persona cu a haci hopi pa e mundo di musica ta Maybelline Arends Croes, kende tambe tabata den sala siguiendo cu atencion tur informacion trece dilanti door di Steven Ambers. “Mi ta hopi contento cu porfin e aspecto di pago di royalties a cristalisa. Esaki ta un derecho cu ta existi for di aña 1912, ora cu e ley a keda introduci den cual ta protege tur creador di un obra y esaki ta encera musiconan tambe,” tabata e prome reaccion di e artista aki. E ley aki, el a splica, ta existi pa hopi tempo pero no ta tur hende ta uz’e den su contexto completo, cu su sancionnan. Bo por tin un ley pero si no ta uza e sancionnan pa control’e, e ta haci e situacion dificil.

Awor ta bini un cooperacion cu instancianan internacional, manera e organisacion aki di Canada, cu ta yuda e compositornan yega na nan derecho, pasobra ta nan cancion y pa cobra pa cada biaha e cancion wordo toca.

E pregunta ta si Aruba ta cla pa e cambio aki. Maybelline ta kere cu si no cuminsa un caminda, lo bo no hacie nunca. “Cada comienso ta dificil pasobra bo ta lanta y bo ta cay. Bo mester gatia prome cu  bo siña cana. Bo no por yega core di biaha. Tur cos ta custumber y e hendenan lo bay custuma. No ta pasobra algo ta malo y a haci’e 100 aña asina, no ta nifica cu mester keda cu e malo ey. E mester wordo coregi y e lo tuma su tempo. Kisas e no ta wordo drecha den un of 2 aña, pero den dies aña sigur e ta wordo drecha. “Mester tin un comienso pa mustra berdaderamente kico ta e derecho di cada hende, e ta algo universal. Tin tur sorto di derecho y tin derecho di compositor tambe y mester tin respet pa esey. E radionan a custumbra cu ta toca e canticanan libremente, tanto di esnan local como esnan internacional. E ta algo cu nan mester compronde, e ta algo internacional y no ta cuestion di bringa ningun hende. Mester tin e respet di ambos banda y sigur compronde y respeta e derecho di autor.”

E mes tabata forma parti di un grupo cu durante hopi aña a traha y reuni pa trata di bini cu e cumplimento di pago di royalties. A pega na momento cu a yega na e parti unda con ta bay cobra e royalties na e radionan.  Ora cu a yega na e puntonan ey a bini e reaccion cu no ta toca mas loke ta di compositornan local. Pesey e intencion a keda pega na intencion pasobra nan tabata depende di e radionan.

Pero pa Maybelline Arends Croes esaki no ta algo cu mester wordo mira manera un bringamento, pero mester bira un cooperacion y compronde posicion di cada un, y trata di yega na otro. E artista no ta kere cu loke e radionan mester bay paga no ta un cantidad grandi di placa, pasobra ta papia aki di cent pa cada bes. E ta algo comun na Merca y Hulanda pa paga pa toca cancion di e artistanan.