Santa Maria kombersando ku Roderick Bernadina di Scorpions

133

PUNDA,– Kosnan ta birando kayente i e rumornan a kuminsa koore fuerte kual ta pone ku awe Vigilante ta bai duna bo e notisia di ku e ekipo Pirata ta tras di e estrea èks profeshonal Roderick Bernadina.

Roderick te ku temporada pasa a militá pa e ekipo di Royal Scorpions despues ku e a firma ku i hunga ku Wild Cats na momentu ku el a yega Kòrsou despues di su añanan komo profeshonal.

Bernadina ta tremendo bateadó i un tremendo outfielder ku por yuda kualkier ekipo. Informashonnan ku nos a risibí ta indiká ku Santa Maria ta den deliberashon ku e estrea aki, sigur mirando ku tin hopi interes di liganan profeshonal ku ta interesá den e outfielder pirata kende ta Sherman La Cruz.

Den 2018 La Cruz lo bai hunga beisbòl pafó di Kòrsou i esaki a trese kuné ku e Piratanan mesora a aktivá i sali tras di Roderick Bernadina, pero e negosiashonnan ta tumando lugá i no tin nada konkreto ainda.