Vesta i Centro Dominguitu a parti punto

Den SDK ku ainda no ta kompletamente kla pa futbòl

134
Hungadónan den lucha durante di partido ku a finalisá empatá na 1 gol.
WILLEMSTAD—E kampionato lokal di futbòl FFK, pa loke ta promé divishon su kampionato 2017/2018, a kontinuá ayera. Esaki ku enkuentro ku a mira akshon, den Stadion Ergilio Hato na SDK, na momentu ku e ekiponan di Vesta i Centro Dominguitu a enfrentá otro.

Tabata e promé enkuentro di promé divishon ku a hunga na Brievengat, ku ainda no ta kompletamente kla pa weganan di futbòl FFK. Esaki debí ku djaluna último, den weganan di segundo divishon, lusnan a paga promé ku e tempu di wega a yega.

Miéntras tantu, ayera por a tuma nota ku no tabata por a toka himno promé ku wega. E anunsiadó den stadion tampoko tabatin e fasilidat pa por a hasi su trabou i komuniká ku fanatikonan presente. Lusnan a sende kompletamente, despues ku ya e enkuentro tabata hungando kasi 10 minüt. E scoreboard den stadion no tabata funshoná, pa fanatikonan por ta na altura e kantidat di minüt di wega i tambe e markadó. Stadion tabata sin bandera, miéntras ku e di kuater ofisial di wega, tabata kantu di liña ku un stul, sin un mesa i/òf kashi tradishonal. Miéntras ku komo e chèri riba e bolo, ketu bai ta sin e bòrchi pa por duna indikashon di kambio i tambe minütnan adishonal ku ta hunga.

E tereno mes si a mustra di ta den bon kondishon, pero tabatin algun trabou, sigur promé ku a hasi e mudansa.

Miéntras tantu tabata rèfri Arthur Gosepa ku a dirigí, a laga kiper di Centro Dominguitu hunga, durante di hinter e promé mitar, ku un kamiseta blou, miéntras ku Vesta tambe tabata na blou.

Banda di tur esaki, tabata un partido ku hugadanan bastante fuerte, unda Gosepa mester a saka algun karchi hel, pa por a mantené e partido bou di kòntròl.

E wega ta finalisá empatá na 1 gol, despues di sosegá tambe asina. Geryon Alberto a habri e markadó pa duna Centro Dominguitu bentaha na di 22 minüt di wega, pa seguidamente Mirco Colina, sòru pa e empate pa Vesta, apénas 4 minüt despues.

Pablo de Avila i Godfried Wawoe tabata e asistentenan di Gosepa, miéntras ku Luis Ospina tabata e di kuater ofisial di e wega.

E kampionato ta kontinuá awe nochi, 8’or, den wega ku tambe lo hunga den Stadion Ergilio Hato na SDK, ora ku e trikolornan di Jong Holland, enfrentá Centro Barber.