Brandley Kuwas lo reforsá e selekshon di Kòrsou

Un tremendo refuerso sigur pa enfrentá Bolivia

1814
Brandley Kuwas aki den akshon kontra El Salvador den stadion Antoine Maduro.
WILLEMSTAD – E direktor tékniko di nos selekshon di futbòl nashonal, Remko Bicentini, manera e la indiká anteriormente, a ekstendé un invitashon atrobe na e futbolista Brandley Kuwas pa djòin e selekshon nashonal di Kòrsou, ku próksimamente lo enfrentá e selekshon di Bolivia den loke ta dos enkuentro amistoso aki na Kòrsou.

E atakante di e ekipo Heracles Almelo, ku tin tres siman siguí ta keda nombrá komo e “Man of the match”, i e siman aki un biaha mas a forma parti di e selekshon ideal di fin di siman tras di lomba, a disidí ku e ta bin Kòrsou i lo reforsá asina e selekshon di futbòl di Kòrsou den e enkuentronan kontra di Bolivia. No ta promé bia ku Brandley ta djòin e selekshon di Kòrsou, esaki ta e di dos okashon ku e ta integrá su mes na e selekshon nashonal di Kòrsou.

Mester remarká si ku ainda Brandley, ku tin un tremendo abilidat komo atakante, por skohe pa hunga pa Hulanda si dado kaso e keda yamá, debí ku e dos weganan ku e selekshon di Kòrsou lo realisá kontra di Bolivia lo ta enkuentronan amistoso. Na 2016 Brandley su nòmber a keda menshoná pa e entrenadó di e selekshon di futbòl hulandes di e tempu ei, Danny Blind.

Pero finalmente nunka e no a ser yamá ni pa forma parti di e selekshon preliminar di Hulanda, miéntras ku pa e selekshon di Kòrsou si e la mira akshon kaba na un okashon i esaki tabata nèt un aña pasá, ora ku e la hunga kontra di El Salvador den Stadion Antoine Maduro ku e resultado 1-1. E tabata klave den e enkuentro aki ora e ta hasi e pase pa e hungadó Felitciano Zschusschen anotá na di 73 minüt di e enkuentro i na di 86 minüt e ta keda remplasá pa Ashar Bernardus.

Dia 20 di mart próksimo e futbolista di 25 aña di edat lo ta rumbo pa Kòrsou unda e lo djòin e selekshon di futbòl nashonal pa start ku e preparashonnan pa e enkuentronan kontra Bolivia ku lo tuma lugá dia 23 i 26 di mart próksimo den Stadion Ergilio Hato na SDK.