Abogado Mohamed: Tin prueba cu Stevie no tabata tin falta di placa

153
ORANJESTAD(AAN): Abogado Mohamed ta abogado di Stevie Fan, kende lo a instrui e Boneriano Jefferson pa bay tira un atraco cu a resulta uno fatal na Wayaca. Diabierna tur hende tabata spera un sentencia. E sentencia no a bin. 25 aña caba ta medio colga riba cabes di e cliente di Mohamed.

E ta splica cu 2 siman pasa nan tabata na corte y tur dos sospechoso, incluyendo e cliente a haya un shock basta grandi den sentido cu masha poco 25 aña di castigo a wordo pidi, mas ainda den e caso aki caminda cu desde comienso, e lo a desmenti y ainda ta desmenti cu tin algo di haber cu loke e Boneriano a haci. E caso a wordo trata dos siman pasa, unda cu un di e puntonan cu toch Mohamed a enfatisa riba dje, tabata e hecho cu e Boneriano tabata ripiti continuamente cu e motibo mayor di con nan mester a bay comete e atraco cu a resulta fatal, tabata pasobra e y Stevie tabata tin necesidad di placa. Den su declaracionnan dilanti di hues, el a bisa cu e negoshi di Stevie no tabata draai bon. E tabata casi bancarota y p’esey eigenlijk nan a bay pa comete of laga comete e atraco y riba ordo di Stevie el a haci’e.

Mohamed tabata tin disponibel afschrifte di banco di e cuenta di Stevie y por a mustra na hues, cu sikiera durante e periodo di e atraco, e tabata tin suficiente placa riba banco. Cu no tabata tin ningun motibo pa bay comete un atraco di cual ni sa, y sa cuanto placa lo bay haya cu un resultado fatal.

A bin pa scucha e decision pasobra e decision en principio lo tabata dia 23 y den siman a haya sa cu hues a pone mas tempran pa awe, diabierna. Su decision tabata cu e ta habri e caso bek, pasobra e falta toch informacion, particularmente financiero di e situacion di Stevie pa e sa si of no, e tin cu lage bay of no. Esey ta algo hopi bon, pasobra un hues cu ta djis tuma decision sin motibo, no ta bon. E hues aki a bisa explicitamente cu si e tin cu laga un hende bay of duna hende 25 aña, pasobra esey ta colga riba su cabes, mester ta sigur di e decision. Si no ta sigur, ley ta duna hues e derecho pa habri e investigacion den e caso bek, loke el a haci. El a habri bek pa manda e caso pa hues comisario pa haya informacion financiero di Stevie y tambe a duna ordo pa fiscal yama tata di Stevie pa bin testigua dia 20 di April, ora e caso ta sigui.

Si esaki literalmente ta e punto cu e ta draai, como cu Mohamed a hiba e defensa tambe riba e punto aki cu ta bisa cu no tabata tin ningun motibo pa haci’e. E cabayero aki tabata tin suficiente placa cu e no tabata tin ni pensa di comete un atraco, corda duna ordo pa e lag’e haci door di un otro persona. Ta spera cu berdad ora cu hues haya tur informacion financiero e ta satisfecho, e cliente di berdad tabata tin suficiente placa, cu e no tin ningun motibo ni e y su compania, pa comete atraco pa haya mas cen.

Convence fiscal

No ta usual cu un castigo di 25 aña ta wordo pidi. E abogado ta kere cu e impacto mas tanto cu e caso aki a haci, cu un hende ta gewoon na su cas y e resultado diripente cu den presencia di su yiunan y su casa, e ta haya un bala den cabes, bo ta hay’e morto, sin cu tin un motibo cu posiblemente ta un atraco. Comunidad ta spanta, comunidad ta geshock. Fiscal den e caso aki, no e victima so ta representa, pero ta representa henter e comunidad tambe y tin cu vocifera tambe e sentimento, cual el a haci tambe door di exigi un castigo hopi halto, cual ta bon cla y raspa loke e ta pensa.

Famianan

Unico hende cu por sa cu tin un kluis den e cas por ehempel, ta Stevie tambe, pasobra e tabata biba na e cas. Abogado Mohamed a comenta cu e tabata biba den e cas berdad. Pero no tin cu lubida, loke sali den e caso aki tambe ta cu Stevie conoce e mucha homber aki for di tempo e tabata tin 14 of 15 aña. Si ta cana continuamente den comunidad Chines, el a hasta papia cu Stevie a papia cu tabata tin yen di placa tras di muraya y cu den otro supermercado tabata tin placa bao di mesa of cosnan scondi. E mes tabata duna informacion cu eigenlijk hopi hende sa caba. No ta nada unico cu ta di Stevie mes el a hay’e.

E caso lo bay wordo trata riba e punto caminda hues a bisa cu e mester mas informacion. Una bes cu e hues haya su informacion, por reacciona riba esey. Fiscal por reacciona y hasta ta bisa cu e Boneriano su defensa tambe mag di reacciona riba dje.