Pa 600 florin....

Kastigu pa dama ku a drenta prizòn ku droga

166
WILLEMSTAD,–  E dama D.W. di 28 aña a presentá dilanti wes ayera despues di a hasi su mes kulpabel di un echo kastigabel.

E dama a presentá ku su abogado mr. Gomez unda el a atmití di a transportá droga. Tabata 8 di yanüari último ku miembronan di seguridat di prizòn mester a kapta un prezu ku droga den su poseshon, despues di a risibí bishita di un dama.

E sospechoso kende a kaba di risibí e bishita tabatin 2 saku di droga den su man. Tur esaki despues ku e miembronan di seguridat tabata vigilá e kámaranan di e prizòn. E dama a atmití unda el a bisa ku e ta responsabel pa su famia i tabata buska trabou pero no tabata haña. El a bisa di a hasi e trabou aki pa 600 florin.

Mas aleu el a splika ku ta e tabatin 2 luna ta papia ku e prezu Carti, unda el a tuma e desishon pa transportá e droga. Tambe el a splika ku e no a papia nunka mas ku e prezu. Fiskal na su turno a bisa di ta tene kuenta ku e sospechoso, unda tambe el a bisa di lo pidi un kastigu pe traha boluntariamente.

El a pidi 1 luna di kastigu kondishonal, ku 3 aña di prueba miéntras tambe lo e mester traha 80 ora boluntario. Wes mr. Paulides na su turno a bisa di lo kastigá e dama na 39 dia di prizòn, di kual 30 dia ta kondishonal ku 3 aña di prueba, miéntras lo e mester traha 80 ora di trabou komo kastigu.