Ainda tin famia di e víktima ta bishitá sikólogo.....

Maton a uza menor di edat den asesinato Chado

7914
Unu di e sospechosonan na kaminda pa wes komisario
WILLEMSTAD,– Korte den promé instansia mester a trata un kaso djárason unda 4 hòmber mester a presentá i responsabilisá nan mes pa un kaso di asesinato.

Ta bin sali na kla ku e asesinanonan a uza un mucha menor di edat pa bai wak si nan viktima tabata na kas.

Ta trata aki di e kaso unda mester a kita bida di e víktima Gerald ‘Chado’ Nicolina, 5 di febrüari aña pasá. Den e kaso aki e hòmbernan Micheal Valdez, Shurendy Castillo, Roberto Roozendal i tambe Shervienne Martina.

Despues ku mester a detené e hòmbernan Shervienne Martina i tambe Micheal Valdez, nan a atmití di a kometé e echo aki, unda despues a detené e otro 2 sospechosonan. E hòmber Roberto mester a asta manda mensahe pa e sospechoso Martina, den forma di menasa pa e hala su deklarashon aden bèk.

Nan a presentá dilanti wes, unda primeramente a presentá e hòmbernan Valdez i Castillo, unda mester a tene nan leu for di otro den e sala debí ku nan mester a haña problema despues di nan detenshon. Tabata na e okashon aki ku mester a pone e hòmbernan na altura ku e kaso lo no sigui mirando ku Valdez a kambia abogado, unda awor el a pasa pa mr. Blonk.

Tambe abogado mr. Wilsoe a deklará adelantá na wesnan i tambe fiskal mr. Hato-Willems, pa posponé e kaso mirando ku e tabata sufri di kebrante di salú. Abogado mr. Blonk kende no tabata bon na altura di tur loke ta den e ‘dossier’, a pidi pa para e kaso pa e studia esaki bon.

Tabata despues ku Roberto a presentá den sala ku e mester a puntra wes dikon a para e kaso, unda wes a pon’é na altura ku su abogado tabata un di esnan ku a pidi pa posponé e kaso pa motibu di salú, unda tambe abogado di Valdez a hasi e petishon aki.

Mirando esaki abogado mr. Dickens kende ta esun ku lo mester sali na defensa di Castillo, a hasi algun petishon pa skucha vários testigu. El a pidi pa skucha e dama ku tabata kompartí bida ku Castillo, unda tambe e la pidi pa skucha shèf di trabou di e sospechoso. Esaki pa sa unda e sospechoso tabata den e ora nan ku ta sospech’é di tabata okupá ku e asesinato.

Loke tabata remarkabel ku a pidi pa skucha famianan di e víktima, esta mama, tata i tambe ruman di e víktima komo testigu unda esaki nan no a keda halsá pa wes. Tin ku añadí ku fiskal a deklará ku tin un testigu di fam J. ku a bisa ku e no tin nada di aber ku e kaso aki, pues pa esaki el a pidi pa no halsa e petishon.

Tambe el a bisa ku tin un miembro di famia di e víktima ku a keda sigui guia di sikólogo, despues di e suseso pues pa esaki tambe el a pidi pa no halsa e petishon aki. Loke tabata remarkabel den e kaso aki ta ku e hòmbernan mester a manda un menor ku probablemente ta yu di kriansa di Castillo, bai wak ku e víktima ta na kas, pa asina kita su bida.

Wes a bisa di lo skucha e testigunan na wes komisario, unda a posponé e kaso pa 7 di sèptèmber próksimo mitar di 10 di mainta, unda lo tuma hinter dia pa tratamentu di e kaso.