Si elekshon tabata awe Nicolas Maduro lo a gana ku 55,9%

158

Willemstad,– Mirando e tantísimo problemanan ku ta surgiendo na Venezuela i ku den sierto sentido tambe ta afektá e islanan ABC, nos ta publiká un sondeo ku a keda hasi na e pais bisiña.

Ekspertonan di Encuestadora International Consulting Services (ICS) a hasi un sondeo kaminda nan a puntra ku si elekshon tabata awe pa ken lo bo a vota.

Remarkabel ta ku apesar di tur e krítikanan riba e maneho i sistema di e presidente Nicolas Maduro, mester bisa ku el a haña un total di 55,9% di sosten di e pueblo, miéntras ku e aspirante di e partido Accion Popular, señor Henri Falcon a risibí apénas 24,9% i e representante di e partido Eperanza por el Cambio (EPC) señor Javier Bertucci a risibí apénas 16,2% di sosten. E dos últimonan tur dos opositor di Maduro.

67,5% a mustra di lo a vota, miéntras ku 3,7% no a partisipá den e votashon i tin 1,3% ku no sa ainda si nan lo bai vota.

E enkuesta a keda realisá ku un márgen di sifra di 0 pa 10 kaminda 0 ta nifiká ku definitivamente e persona lo no Sali su kas bai vota i 10 ta nifiká ku e lo Sali bai vota.

-Kon grandi e probalidat ta ku lo bo vota den e próksimo elekshonnan pa presidente di Venezuela dia 20 di mei e aña aki?

E sondeo ku a keda realisá entre 20 di aprel i 4 di mei a indiká ademas ku 43,8% di e votadónan ta sinti nan mes identifiká ku e partido Sosialista Unido di Venezuela ((PSUV), kual ta e organisashon polítiko prinsipal di e pais ku ta konta ku mas di seis mion 400 mil militante.

E kantidat di hendenan ku por vota na Venezuela ta superá 20 mion 759 mil venesolano, segun e ultimo kondeo elektoral, di kual lo tin mas o ménos 13.979.660 ku lo vota.

Otro enkuestanan tambe ta duna e kandidato Nicolas Maduro komo ganadó, tal manera tabata e kaso ku e firma ekuestado, Consultores 30,11 o Hinterlaces.