‘Papa’ Isenia ku 2 golaso pa yuda Vespo kibra Real Rincon su invikto

Ayera den futbòl na Boneiru

53
Christopher 'Papa' Isenia.
BONEIRU—E futbolista yu di Kòrsou, Christopher ‘Papa’ Isenia, kende ta den futbòl na Boneiru ku e ekipo di Vespo. Ayera tabata grandi den e klèsh, entre ekiponan di bario di Rincon. Un ke otro na momentu ku e la anotá na 2 okashon, den triunfo di Vespo, ku skor di 3-2, riba e ekipo di Real Rincon. Tabata wega ku a mira akshon dilanti di un tremendo públiko, den stadion na Rincon.

E ekipo di Real Rincon ku a pika dilanti, for di un tiru liber kobrá pa Artyon Cicilia. Seguidamente Andre Piar ta sòru pa e empate, pa asina e wega sosegá empatá na 1 gol.

Den e parti komplementario, tabata ‘Papa’ Isenia, ku ta duna Vespo bentaha 2-1. Esaki for di un tremendo tiru, for di un tiru liber.

Sinembargo Robert Frans, ta pone kosnan pareu, anotando for di un tiru penal pa Real Rincon.

Tabata momentu ku tabata falta 5 minüt pa e pitaso final, ku ‘Papa’ Isenia, den un hugada inteligente, ta logra kita e bala for di un defensor kontrali pa sigui avansá i anotá, pa manda su ekipo un biaha mas ariba. E bentaha aki, nan no a pèrdè mas i asina ta bin logra 3 punto, den wega ku nan ta kibra Real Rincon su invikto.

Giandro ‘Gigo’ Steba, kende ta otro futbolista ku tabata den futbòl na Kòrsou, tambe a mira akshon ayera pa Vespo, unda Isenia a resultá e MVP di wega.

Tabata partido ku rèfri Ashier Martines, kende tin apénas algun siman dirigiendo, a dirigí un tremendo partido. E la sa pa tene e emoshonnan bou di kòntròl, unda tabatin 3 ekspulshon.

Ku e golnan di ayera, di tantu Artyon Cicilia di Real Rincon i Christopher ‘Papa’ Isenia di Vespo, nan ta empatá awor ku Rai Cicilia di Atlétiko Flamingo, tur ku 9 gol, komo e trio ku ta enkabesá e lista di goliadónan di kampionato di futbòl na Boneiru.