Mervienne Dorothea a gana Extura su evento deportivo

Den representashon di Kolegio San Dominico ayera na SDK

48
Ganadonan di e evento.
WILLEMSTAD—E alumno di Kolegio San Dominico, kende ta Mervienne Dorothea, a logra e premio máksimo den e evento deportivo organisá pa Extura. Tabata un kompetensia ku a tuma lugá ayera, riba e pista di atletismo den Stadion Ergilio Hato, na Brievengat.

Esaki entre alumnonan di skolnan di fundeshi, kual tabata organisá pa Extura.

 

“E wil di bida ta sigui drai. Konstantemente nos ta den moveshon, ku nos ko’i kareda”. Pa duna un èkstra empuhe i sigui alsa e konsientisashon riba kon importante un seguro di entiero ta pa kada un persona fo’i chikí te grandi, djaluna último 21 di mei 2018, Extura a organisá e evento deportivo aki, na SDK.

 

Alumnonan di skolnan di fundeshi di Kolegio Sta Clara, Kolegio Cola Debrot, Kolegio San Dominico, Kolegio Dodo Palm i Kolegio Sta. Famia tabatin e tarea pa traha nan ko’i kareda di mas kreativo i kore, kompetiendo ku otro, riba un distansia di 60 meter.

 

Despues di un warming-up duná dor di e coachnan di Personal Training Curaçao i algun buèlta preliminar, e ganadónan di e kareda final a resultá:

  • Thayshendrick Goeloe di Kolegio Dodo Palm, kende a keda na di 3 lugá.
  • Shedeyion Sirvania di Kolegio Sta. Clara, a kaba komo di dos finalista.
  • Jeodry Martina di Cola Debrot, a tèrminá e kompetensia, komo promé finalista.

 

Miéntras ku e ganadó apsoluto, a resultá Mervienne Dorothea, alumno di Kolegio San Dominico.

Komo ganadó, e la bai ku e título máksimo i e cheque na balor di Nafl. 2.000,= pa invertí na su skol.

 

Tabata un dia, unda alumnonan di e skolnan ariba menshoná, sigur a disfrutá, sea partisipando i otronan animando nan kompañeronan di skol durante di nan partisipashon i sigur a gosa di un dia, otro for di demas dianan di skol.