Rapòrt SOAB riba José Jardim

Riba afèr Bearing Point

304
SKALO– Direktor General di Banko Sentral di Kòrsou, CBCS, ta bou di lupa serka SOAB. Ta trata di e proyekto di ICT (outomatisashon) na Ontvanger di Kòrsou ku un komishon instalá pa Jose Jardim a atendé. Segun un investigashon di Vigilante, kosnan no a kana korekto.

Ofisina Sentral di Kompatibilidat di Gobièrnu, SOAB, a keda enkargá ku un investigashon pa determiná si e proseso pa otorgashon di e proyekto na Bearing Point a kana segun reglanan korespondiente di destaho públiko.

Ta asina ku temporada ku Jose Jardim tabata minister di finansa, den un karta fechá 29 di sèptèmber 2014, Ministerio di finansa a hinka Bearing Point bèk den un destaho públiko mionario kalkulá e entre 12 pa 20 mion florin. E suma eksakto nunka a keda determiná.

E desishon pa inkorporá Bearing Point bèk den e proseso di destaho ta unu kuestionabel (betwistbaar) pa dos motibu: 1. Bearing Point ya no a keda kalifiká komo e dos último kandidatonan pa sigui e siguiente buèlta miéntras 2. Jose Jardim kende tabata minister di finansa e temporada ei, resientemente a kaba di asumí  un posishon den staf i maneho di mesun proyekto ku gobièrnu a duna Bearing Point, mediante un komishon ofishal instalá.

Ta trata di e proyekto di informatisashon digital na Servisio di Impuesto. E asina yamá proyekto  ICT Platform Belastingdienst Curacao. Den e proyekto aki a inskribí un total di 5 kompania konsultorio. KPMG, IBM, E&Y, Computech i finalmente Bearing Point. Riba 16 di yanüari 2014, un komishon instalá pa gobièrnu a habri e ènvelòpnan. For di e sinku kompanianan, despues di analisá e ofertanan, a saka 3 afó. E&Y, IBM i por último Bearing Point a sigui pa e siguiente rònt. Riba 10 mart 2014 a keda di tene un presentashon i demostrashon di e modelonan presentá pa e 3 último kompanianan den kontentá. Despues di e presentashonnan i diferente reunion tumando lugá, e dos kompanianan EY i IBM a keda selektá pa bai e último rònt. Nifikando ku Bearing Point a kai afó.

Pero, 4 luna despues, den un karta fechá 29 di sèptèmber 2014, IBM i EY ta risibí un karta ku e komishon instalá pa selektá e ganadó dje destaho, a bin kambia algun prosedura. En bes di bai hasi bishita na diferente lokalidat pa wak i analisá e sistemanan presentá di outomatisashon di impuesto, e kandidatonan a haña 10 dia pa traha riba un “test case”. I athunto den mesun karta, e komishon a manda bisa IBM i EY, ku e di tres kandidato kende TABATA envolví durante e promé ròntnan, (“betrokken is geweest) ta bolbe drenta i wòrdu invitá pa un demostrashon. E kandidato aki tabata Bearing Point.

Despues ku Ministerio di finansa bou di maneho stratégiko di Minister Jardim a hinka Bearing Point bèk den e destaho, Bearing Point a bin gana EY i IBM. Sifranan no konfirmá ta menshoná ku e ofertanan den e destaho a varia entre 12 pa 20 mion florin.

Despues di otorgashon, Jardim a bai traha komo konsehero pa guia e proseso di implementashon ku Bearing Point a gana.

Entretantu, SOAB a inisiá un investigashon riba e prosesonan ku a tuma lugá entre 2014 te na 2017. Jardim a retirá komo minister di finansa i keda akordá ku sufisiente integridat pa asumí un posishon den maneho di CBCS, Banko Sentral.