Jose Jardim
Punda– E proyekto di ICT, outomatisashon na Servisio di Impuesto, no a wòrdu konsiderá den e sondeo i investigashon di integridat riba José Jardim.

Jardim, promé di a drenta Banko Sentral a wòrdu kuestioná despues ku Bearing Point a gana un destaho pa outomatisá Servisio di Impuesto.

Den un karta ku Vigilante tin na su disposishon, Jose Jardim por wòrdu kuestioná severamente riba su integridat profeshonal. Esaki, kombiná ku e susesonan rondó David van ‘t Hof, kual investigashon, ta den proseso na Ofisina di Akountent Gubernamental, SOAB.

Ta trata di un karta fechá 29 di sèptèmber 2014, unda pa rasonnan te ainda deskonosí, Jardim a pèrmití pa laga Bearing Point drenta bèk den un destaho, despues ku ya Bearing Point a kai fo’i dje kompetensha i ròntnan final. E situashon ta kuestionabel (“betwistbaar, red) debí ku na 2017 ta bin resultá ku mesun Jardim kende tabata minister di Finansa, a tuma “buiten bezwaar” pa bai guia e proseso ku Bearing Point a bin gana e destaho, kual el a permití e kompania drenta bèk. Esaki despues ku ya e ministerio di finansa kende e tabata manehá, a bisa dos otro kompania, ku ta nan dos so a keda den e último rònt di e destaho. E destaho tabata bou di guia di un komishon, unda por sierto Gregory Damoen a tuma su retiro despues ku e la konstatá ku iregularidatnan tabata tumando lugá.

E èks miembro di e komishon di selekshon, Damoen, pa motibunan probablemente di mal kontentu i desakuerdo a baha bai laga e komishon ku nan trabou. Fuentenan a bisa ku Damoen lo no tabata kier a partisipá mas den e komishon debí na diferente iregularidat ku tabata tumando lugá durante e proseso di destaho públiko rondó dje proyekto di Plataforma ICT na Servisio di Impuesto.

Na dado momento, e komishon di selekshon, fo’i 5 kompania, a invitá e dos último kompanianan pa e siguiente rònt. Esakinan tabata Ernst & Young (EY) i IBM. Bearing Point, nunka tabata riba agènda pa e último rònt di destaho, te na un karta, kual a kue tantu EY komo IBM di sorpresa. Den e karta en kuestion, a informá e dos otro kompanianan ku e di tres kompania, Bearing Point ta bèk den wega! Pues a hinka Bearing Point atrobe den e destaho, sin previo splikashon na e dos otro kompanianan, esta EY i IBM.

Temporada ku Jose Jardim tabata minister di finansa, den un karta fechá 29 di sèptèmber 2014, (redakshon tin un kopia), Ministerio di Finansa a hinka Bearing Point bèk den un destaho públiko mionario kalkulá entre 12 pa 20 mion florin.

Despues ku Ministerio di Finansa bou di maneho stratégiko di Minister Jardim a hinka Bearing Point bèk den e destaho, Bearing Point a bin gana EY i IBM. Sifranan no konfirmá ta menshoná ku e ofertanan di EY i IBM, den e promé ròntnan tabata hopi mas mihó ku esun di Bearing Point.