Legends of The Game ta den marcha 2019 ku Estreno mas Pikete

101
E dos motor nan tras di Lagends Of The Game.

WILLEMSTAD,—-Na hopi okashon nos a bin ta bisa ku temporada di Karnaval 2019 lo bai ta un temporada históriko. ‘E Mulina’, a haña un informashon direktamente for di Hulanda, ku sin duda ta bai bira tópiko di kombersashon riba e dia di awe.

Di informashon ku nos ta disponé di dje ta bisa ku  e grupo di Karnaval Estreno Mas Pikete ta bai marcha ku tres agrupashon musikal, ta trata aki di DREAMS, Dolce Banda i awor ta bin aserka agrupashon musikal Legends Of The Game.

E nòmber Legends Of The Game por zona nobo den bo orea, pero ta trata aki di agrupashon musikal No Game. Pero ku awor nan ta bai Karnaval bou di nan nòmber nobo Legends Of The Game. Nos tin informashon ku 99% tur e músikonan ku a forma parti di No Game ta huntu den Legends of The Game.

Paso na final di dia, ta tur e músiko nan huntu a hasi historia den nos farándula lokal i Reino Hulandes. Nos tin informashon ku e front lo bai ta forma pa Long, Reinier i tambe nòmber di Rich Pieter a ser menshoná, pues ta trata aki di sin duda un front ku ta master den pone ambiente den temporada di Karnaval. Pero loke ku ta bai bira tópiko di dia ta nòmber di e agrupashon musikal Legends Of The Game.