Dama tabatin hinka i kòrtá rònt su kurpa

Hòmber a bai entrega su mes na Polis  enkonekshon ku  dama hañá morto den kas

288
Outopsia lo bai revelá kua ta e hinka ku a kita bida di e dama i tambe kuantu hinka e la sufri.
Willemstad—-  Djamars den oranan di anochi un hòmber dominikano a presentá na warda di Polis na Rio Canario na unda e la entrega su mes enkonekshon ku e kaso di asesinato ku a tuma lugá den e kas den Corcobastraat.

Tabata djamars 7 di ougùstùs 2018 alrededor di 13.21 or di mèrdia, Sentral di Polis a dirigí un unidat polisial na un kas den Corcobastraat pa un dama drumi abou den kas i ku no tabata duna señal di bida. For di un investigashon preliminar ku polis a hasi na e sitio, a resultá ku un bisiña di e dama ariba menshoná a sinti su falta i a bai wak e dama na su kas. Via di un bentana a tuma nota ku e dama tabata drumi abou den un plas di sanger i no tabata reakshoná.

E dama tabatin diferente kòrtá i hinká na vários parti di su kurpa, ku ta indikashon, ku tabatin uso di violensia den e kaso aki.

Alrededor di 14.30 or dòkter di polis a konstatá morto di e dama Zacarias Guzman, nasé na Sto. Domingo, 10 yüli 1954.

Riba òrdu di Ministerio Públiko a konfiská e kurpa sin bida pa mas investigashon. Kontinuando ku un investigashon relashoná ku un kaso di violensia ku morto, ku a tuma lugá na e  kas den Corcobastraat  djamars mes esta dia 7 ougùstùs 2018, alrededor di 22.55 di anochi, e hòmber J.C.H.C., nasé na Sto. Domingo, di 31 aña di edat, a entregá su mes na warda di polis Rio Canario komo sospechoso den e kaso ariba menshoná.

En konekshon ku e detenshon aki a tene un entrada hudisial na kas di e sospechoso i a haña i konfiská artíkulonan ku ta importante pa e investigashon.

A presentá e sospechoso dilanti di un fiskal ouksiliar ku a ordená su enkarselamentu pendiente di mas investigashon. Vigilante por a komprondé ku despues di e forsageo unda e víktima a sufri vários kòrta i hinka unda e la laga basta manchanan di sanger atras e sospechoso a trata di limpia esakinan. E la usa un mòp i asta a basha kloròks den e kas limpiando pa trata di kita e pistanan pero debí ku ta basta kaminda tabatin sanger e no a logra di limpia e kas por kompletu. Reshèrshinan Forensiko ku a tuma nota di markanan di sanger ku a keda limpia a bin topa ku e mòp ku a ser usa ku tambe tabata shushi na sanger. A konfiská e mòp i tambe e bòter di kloròks ku a ser usa pa trata di limpia e manchanan di sanger.  E kaso ta ketu bai den investigashon.