Hues ta rechasá mandamentu di  karta i  prohibishon pa parteranan drenta Kraamkliniek

1052
Punda—- Hues de Kort ayera a adelantá e desishon den e kaso di e parteranan independiente  ku a entamá  un huisio sumario kontra Fundashon Duna Lus( Kraamkliniek) . E desishon mester  a keda tuma djabièrnè pero hues a bisa ku mirando e interes di e damanan embarasá e desishon mester a keda tuma mes ora. Hues a bisa den su veredikto ku e Fundashon mester para ku e mandamentu nan di karta pa e dama nan i ku e partera nan lo keda ku akseso pa sigui bin e klínika pa asina sigui guia nan kliente nan.  Segun e veredikto mas aleu e Fundashon lo mester skibi un karta bek  den 5 dia  i rektifiká ku  tur kos lo sigui mesun kos i ku nan lo wòrdu guia pa nan partera na e klínika.

Ta trata aki di un kaso ku tin 1 aña kaba ta andando pero a inisiá for di 2010.  E Fundashon lo mester a manda un karta pa vários damanan na estado entre 7 luna bai ariba  kaminda nan ta duna nan di konos’é ku entrante  16 di Yanüari próksimo si nan partera nan independiente no firma  e loke ta keda yama “Toelatingsovereenkomst” ku e Fundashon a pone riba mesa ,nan lo no por drenta  e klínika ni tampoko nan no por  sigui duna nan e servisio ku nan a kustumá kuné di nan partera. Esaki a pone ku e grupo di partera independiente ku no ta den e servisio di e Fundashon huntu ku nan abogado mr Martis, di bai korte pa pidi hues impedí e Fundashon pa stòp di sigui manda e kartanan i  para e prohibishon  di drenta e klínika si e akuerdo no keda firma. Segun e karta e damanan na estado ku a kustumbrá ku algun di e parteranan aki kisas pa 9 luna largu i a konstruí un konfiansa ku nan, lo mester bai ser guia pa parteranan di e Fundashon mes. E parteranan independiente no ta di akuerdo ku e loke e Fundashon ke pa nan firma mirando ku Kraamkliniek no ta un hospital kaminda nan tin ku bai keda instruí ki pa hasi. Segun abogado Luttikhuizen representante di e Fundashon, ku nan ta para pa kalidat ku tur e leinan nesesario i ku por traha ku instansia nan di gobièrnu i otro organisashonnan. E abogado a bisa mas aleu ku e Fundashon ta e responsabel al final pa fasilitá kalidat pa un bon kuido materno. Abogado Martis ku ta esun ku a representá e  parteranan independiente a duna di konos’é ku su klientenan ta ehersé nan funshon manera mester ta . Segun e abogado for di ora ku un dama na esatdo i su pareha  skohe pa haña guia i kuido serka  un partera esaki lo keda involukrá ku un proseso delikado ku tin ku guia e parto. Tambe e abogado a splika ku e partera ta duna servisio entre otro di kuido, kontròlnan nesesario,aviso i charla nan. Esaki segun e abogado ta trese un relashon hopi sera tantu entre e dama i e partera. Mas aleu e abogado a splika ku e klínika a hunga un ròl di mas ku 60 aña den vários kasonan di parto kaminda nan a fasilitá  servisionan nan tambe na e komunidat di Kòrsou. E abogado a bisa ku esaki no por ta otro mirando ku no tin un di dos klínika na Kòrsou ku ta spesialisá den e servisio aki so. Segun e abogado mayoria dama no ta skohe pa haña yu na kas i di kual e partera nan no tin otro kaminda pa bai. Hues ta rechasá e multa di 5 mil florin ku Martis a pone pa kada dia ku e partera nan no por drenta i 1000 pa kada bia ku e karta sali. Dia 7 febrüari lo bin un kaso nobo kaminda hues lo bai purba yega na un akuerdo ku ámbos partido.