Mac Cijntje a skak mat Nashonal i Suzy

4180
Punda–E desishon di Mac Cijntje pa saka Pueblo Soberano fo’i e aktual koalishon, a simplemente skak mat Partido Nashonal en general i partikularmente nan minister Suzanne Camelia Römer. Ayera riba Facebook Camelia Römer ademas a haña diferente krítika riba un otro proyekto di 5.6 mion otorgá na su kasá Carl Camelia.

Cijntje, kende algun aña pasá ya kaba a wòrdu desepshoná pa èks kolega di Nashonal, Earl Balborda den e proyekto pa apliká un sistema mas moderno pa zonifiká Kòrsou, no kier a tuma niun riesgo ku Suzanne Camelia Römer kende no ke tende ni mira nada mas sino adaptashon di e sistema bieu di EOP (Euclidean Zoning).  Ayera den un rueda di prensa, Camelia Römer a defendé un biaha mas e sistema antiguo di zonifikashon i bisa ku úniko problema ta ku tin demasiado tereno destiná komo área di naturalesa. Segun Camelia Römer esei ta e problema mas prinsipal di EOP i ku tin sufisiente eksperto lokal ku por trese e kambionan nesesario.

Diferente: segun Camelia Römer no tin nada robes si sigui adaptá i implementá EOP.

Den un reakshon na Vigilante, Mac Cijntje a splika ku “Camelia Römer ta papia spektakel”. Cijntje kende tin años ta tratando na traha for di parlamento i introdusí e sistema di “Form Based Codes” ta kombensí ku EOP mester bai den baki sushi pasobra e ta trahá riba un sistema di mas di 85 aña bieu.

E konflikto aki netamente ta lokual a pone ku awe e kabinèt Koeiman a dura nèt 7 siman. Mac Cijntje ku su desishon a hasi Suzy Camelia demishonario sin kapasidat di sigui e trayekto bieu di EOP. Camelia Römer a duna un deklarashon ayera di “tin asko ora hende menshoná sumanan manera 10 mion”. Riba Facebook durante un grabashon di e reportero Yves Cooper, diferente hende a kòrda Camelia Römer riba e proyekto di 5.6 mion ku e Hunta di Minister kual el a forma parti di dje, a duna su kasá Carl Camelia.•