PIN ta kere ku mester atendé ku víktimanan di krímen mas mihó

1136
Kandidatonan di partido PIN ayera durante rueda di prensa.
PUNDA,– Lider di partido PIN, señora Suzy Camelia Romer a splika ayera ku pa loke ta seguridat, aki bo tin kosnan ku bo ta hasi riba términonan largu, enseñansa por ehèmpel ta un di nan i tambe Arte Deporte i Kultura.

Suzy a splika ku den término medio i kòrtiku, e área represivo, e.o Polis i Prizon mester reforsá, muchu tiki hende. Suzy ta bisa ku mester traha ku hustisia rápido, mester mira ku kastigu ta kai mas lihé.

Di otro banda mester traha mas tantu posibel kaminda bo tin hendenan ku kastigunan alternativo, ku ta tene hendenan ku no tin nodi di sera.

Suzy ta bisa e.o un hende ku kometé un delito chikí i e no ta menasa pa otro hende, nos mester atendé ku medionan sosial, ta nifiká ku mester fortifiká reclasering. Tambe mester reforsá slachtofferhulp, nan mester di mas hende i mas medio pa nan por atendé mas víktima di krímen ku hopi biaha ta keda ku trauma. Suzy a bisa tambe ku mester tin un manera muchu mas mihó pa atendé ku e víktima.