Suzy Romer: Partido PIN ke sero (0) dropout

Enseñansa ta e kos mas importante na e momentunan aki

505
PUNDA,– Ayera tardi tabatin e rueda di prensa yamá pa partido PIN kaminda e lider Suzy Camelia Romer a splika ku su partido ta kere ku den partisipashon den komunidat bo ta solushoná problemanan, paso huntu bo ta desaroyá e Korsou di mañan.

Suzy a splika ku e nivel di seguridat aktualmente dor di kriminalidat, pero tambe dor di salarionan abou i inseguridat di trabou tambe ta yuda na esaki.

E lider di PIN a sigui bisa ku ta poko dia pasa tabatin elekshon i nunka tabatin un debate profundo riba pobresa di pais, riba e partinan manera entre bida sosial, trabou, enseñansa ets.

Sra. Romer ta bisa ku no tin atenshon i dedikashon di parti di polítika, solamente gañamentu riba otro i ofendé otro. Segun Suzy étika no ta varia ku tempu i no ta pòrnada tin 10 mandamentu tur tempu.

E ta splika ku e asuntu di laga kos bai tin nos den e situashon ku nos tin ku dal man riba mesa i p’esei partido PIN a traha un manifesto dinámiko i ta spera ku pueblo lo relashoná bek riba esaki pa asina e partido por dialogá ku pueblo. Tambe Suzy a splika ku PIN a duna algun pensamentu riba partisipashon i integridat pa mira kon por atendé ku infrastruktura personal.

PIN a bisa ku nan kier 0 dropout i esaki no ta un soño pero ta loke e partido kier logra ku su programa. Segun e èks minister  nan sa ku esaki no ta bai yega aki rápido i kisas e por dura 5 òf 10 aña, pero ta yega e momentu ku enseñansa mester sòru pa niun mucha no kai afó.

El a duna un ehèmpel kaminda e ta splika ku ta dependé di talentonan di e hóben, bo ta sòru pa bo form’é kaminda su talento ta. Tur ta siña e base, pero na dado momentu bo mester atendé ku e hóben pa bo no tin nodi di bisa ku bo tin 37% di dropout. Esaki ta un bèrgwensa, asina Suzy a bisa.

“Si bo kambia esaki, bo ta sòru pa e mucha no haña solamente e parti kognitivo, bo ta buska otro hende pa yuda e muchanan ku nan tarea i laga nan hasi e loke nan tin na talento. Bo ta garantisá un edukashon muchu mas profundo” segun Camelia Romer.