WILLEMSTAD—E selekshonnan nashonal di futbòl di Kòrsou i El Salvador a enfrentá otro ayera den un wega amistoso ku a mira akshon den Stadion Antoine Maduro na Kintjan. Esaki unda e ekiponan no a logra yega mas ku un empate na 1 gol pa banda.

Ta trata aki di ekiponan ku na yüli benidero lo ta den mesun grupo, den Kopa di Oro 2017, na Merka, Esaki huntu ku tambe e selekshonnan di Mexico i Jamaica.

E enkuentro di ayera tabata den kuadro di e preparashonnan tambe pa e buèlta final di Kopa di Karibe, ku na yüni próksimo lo hunga na Martinique. Aki Kòrsou lo ta den lucha pa e titulo, huntu ku tambe e ekiponan di Jamaica, Martinique i tambe Guyana Franses.

E miembronan di nos selekshon nashonal ta na Kòrsou aktualmente pa un siman di trainingscamp, unda a probechá pa realisá e enkuentro di ayera, unda bastante tabata e fanatikonan di e deporte rei futbòl, ku a haña kaminda pa stadion i sigur a gosa di e partido.

E enkuentro a keda dirigí pa rèfri Ricangel ‘Riky’ de Leca, kende tabatin un tremendo aktuashon i riba tur hugada, ku karchinan na ora i a haña ayudo na liñanan di Jade Salamantin i Horothby Cabrera, kende tur ta riba lista di FIFA, pa Aruba. Juniel ‘Aranja’ Adelina, rèfri tambe riba lista di FIFA, pero pa Kòrsou tabata e di kuater ofisial di e wega.

E enkuentro mes a sosegá sin gol i tabata den e parti komplementario ku primeramente Kòrsou ta anotá pa pika dilanti despues di un tremendo hugada individual di Brandley Kuwas, kende ta fasilitá Felitciano Zschusschen e bala, unda esaki no ta pordoná i ta anotá, pa pone Kòrsou ariba 1-0.

Despues ku Kòrsou a kue bentaha, El Salvador a bai kompletamente den atake, unda inkluso a bin algun kambio ofensivo i ta logra den nan intentonan. Un ke otro hungando den minütnan di deskuento, na momentu ku Rodolfo Zelaya sòru pa e empate.

Durante di sosiegu di e enkuentro aki, tabatin un homenahe pa e selekshon nashonal di futbòl kategoria U1-3, despues di nan tremendo presentashon na Aruba. Un ke otro unda den kompetensia ku e selekshonnan di Aruba, Boneiru, St. Maarten, Colombia i Venezuela, nan ta alkansá final di forma invikto i ta kai vensí kontra Aruba, ku skor mínimo den final, unda nan mester a konformá ku e titulo supkampion.

Miéntras tantu e selekshon nashonal di Kòrsou ta sigui ku nan preparashonnan durante di e próksimo dianan te ku djaluna benidero, pa seguidamente bolbe bini huntu na yüni próksimo.

Tékniko Remko Bicentini, sigur tabata satisfecho ku e prestashon di su ekipo, meskos tambe ku e futbolistanan, despues di partido.

Kòrsou ayera a hunga ku e siguiente aliniashon:

Eloy Room (Jarzinho Pieter), Shanon Carmelia (Dustley Mulder, kapitan Cuco Martina, Darryl Lachman, Ayrton Statie (Doriano Kortstam), Leandro Bacuna, Kemy Agustien (Jeremy de Nooijer), Jarchinio Antonia (Elson Hooi), Gevaro Nepomuceno (Gino van Kessel), Rangelo Janga (Felitciano Zschusschen) i Brandley Kuwas (Ashar Bernardus).