Den futuro ningun ku a studia mester sali perhudiká dor di kòrte riba nan

Tin un solushon duradero pa e "buraku den AOV" ora "bursaal" yega su edat di penshun.

321

Willemstad- Studiantenan/ bursalen i tambe eks-studiantenan ku sali for di Kòrsou pa sigui nan estudio den eksterior te na e momento aki ta pèrde derechi riba un pida di nan AOV na momento ku nan yega e edat di penshun.

Motibu di esaki ta ku ora nan bai studia i no ta biba mas na Kòrsou, nan seguro riba AOV ta kaduká. Esaki ta nifiká ku kada un studiante ku sali for di Kòrsou de fakto ta wòrdu kastigá na momento ku e yega e edat di kobra penshun. Sinembargo hopi di e siudadanonan aki no ta na altura di esei, te ora nan yega edat di kobra penshun. Na e momento ei nan ta haña notifikashon di SVB ku tin un dedukshon riba e suma ku nan tin ku kobra. Pa kada aña ku e studiante permanesé den eksterior tin un porsentahe ku ta dedusí for di su AOV. E dedukshon aki ta keda konta pa restu di su bida.

Además e studiante no ta bin na remarke tampoko pa un pida AOV na e pais ku ela studia durante e añanan ku e permanesé na e pais di estudio. Pues e ta keda ku un buraku permanente den su AOV.

Despues ku sra. Marilyn Alcalá-Wallé a hasi un investigashon ela konstatá ku tin un solushon pa e problema aki. Ta p’esei ela aserká e minister di Asuntunan Soshal i di Labor pa hasi un adaptashon den e dekreto (Landsbesluit) di 26 yüli 1960 ku tin referensia riba ehekushon di e lei di AOV pa hasi un kambio, kaminda ta hasi posibel ku studiantenan lokal, ku ta bai studia den eksterior, ta keda ku nan derechi i seguro riba AOV ounke nan ta studia den eksterior. Di e forma aki studiantenan i futuro studiantenan no ta wòrdu perhudiká innesesariamente. Finalmente por informá ku un kambio di indolé aki por tuma lugá basta rapido.