Nos selekshon U-17 ku dos wega di preparashon

Promé ku nan sali pa Panama

605
Nos selekshon di U-17 ku ta en buska di nan klasifikashon pa Mundial di India 2017.
WILLEMSTAD – E selekshon di futbòl U-17 ta preparando den gran forma pa nan siguiente kompromiso na Panama, unda nan lo bai en buska di nan klasifikashon pa e mundial U-17 ku lo tuma lugá na India di 6 pa 28 di òktober 2017.

Nos a komprondé ku e refuersonan di Hulanda lo ta yegando Kòrsou pa dia 14 di aprel próksimo i e plan ta pa hunga dos enkuentro di preparashon aki na Kòrsou kontra di e ekiponan Centro Dominguito i Jong Holland.

Nan lo biaha dia 19 di aprel pa Panama i dia 20 di aprel nan lo tin un seshon di entrenamentu planiá den oranan di mainta i pa dia 21 di aprel pa mitar di shete (18.30), ora di Kòrsou, nos enfrentá e selekshon di Haiti den e promé enkuentro di e pul A ku ta konsistí di e selekshonnan di Panama, Honduras, Haiti i Kòrsou.

Seguidamente nos lo enfrentá e selekshon di Honduras dia 24 di aprel pa 6’or atardi i por último nos lo enfrentá e ekipo anfitrion Panama dia 27 di aprel pa mitar di nuebe anochi (20.30). Tur e enkuentronan lo tuma lugá den e Estadio Maracaná, ku ta situá na Panama City.