Cantina El Patron ta kumpli ku tur rekisitu pa nan por operá

Segun propietario Joric Vermeij:

566
Cantina El Patron:  Segun Joric Vermeij tur papel ta na òrdu. 
WILLEMSTAD—Último dianan Cantina El Patron ta den notisia den kuadro dje echo ku tin bisiñanan ku ta sinti nan mes molestiá pa presensia dje establesimentu aki ku lo perkurá pa músika ku lo ta estorbo pa nan trankilidat.

Den e kuadro aki e bisiñanan a keda di entrega opheshon pa evitá ku Cantina El Patron lo por opera den e kaya. Ayera Vigilante a sostené kombersashon ku Sr Joric Vermeij kende a indiká na nos ku el a kana tur su kamindanan pa por opera Cantina El Patron. El a indiká na nos ku el a kana su kamindanan i ku e tin su stèmpelnan den kuadro dje ruta ku el a kana pa asina tur su asuntunan ta legal. El a indiká na Vigilante ku e ta biba na Kòrsou for di 2003 i ku el a hasi un invershon di 500 mil florin den Cantina El Patron. Tambe el a indiká na Vigilante ku e tin 23 yu di Kòrsou ta traha p’e i apénas 3 hulandes oropeo. E ta kere den duna un empuhe na ekonomia di Kòrsou i el a skohe pa hasi su invershon den Cantina El Patron, manera el a indiká na Vigilante. E no por kaba di komprondé e problema ku e bisiñanan tin ku su lugá kaminda hasta a ser trese pa dilanti ku nan ta a-higiéniko. Pa lokual ta trata e parti aki el a hasta mustra Vigilante ku el a aserka su abogado. Mi kushina ta limpi limpi, tabata e palabranan di Sr Joric Vermeij. El a mustra Vigilante mas aleu riba e echo ku e públiko ku e ta bai mek riba dje ta mas lokal i ku hasta e lo tin entertainment di agrupashonnan musikal lokal.