Ladronisia den outo i 2 detenshon na WTC

Riba tereno di stashoná outo

1549
WILLEMSTAD—Tereno di stashonamentu di WTC, ayera den oranan di atardi, tabata sitio unda polis a hasi detenshon di dos hòmber. Esaki riba sospecho di ladronisia for di den un vèn di karga.

Tabata un empleado di un negoshi ku ta hasi entrega di produkto, ku a yega na edifisio di WTC, pa kumpli ku su labor. Mirando ku ta un paki chikí e tabatin pa entregá, e hòmber aki a laga algun pertinensia den e vehíkulo di trabou atras i a baha pa hasi e entrega.Den ménos ku 5 minüt, na su regreso, el a sinti falta di entre otro su telefon, pèchi i tambe un etuí ku tabata kontené plaka kèsh, ku el a laga atras den e vehíkulo.

Mesora el a komuniká ku polis, ku rápidamente a yega na e sitio. Un investigashon na e sitio a bin konstatá ku tabatin dos hòmber sospechoso sintá den un outo, no muchu leu for di e sitio di e suseso. Polis a kontrolá e hòmbernan aki i den e vehíkulo a haña plaka kèsh i sobra artíkulonan ku un ratu promé a keda hòrtá for di den e vèn.A detené e hòmbernan, respektivamente L.C.F.E. di 34 aña di edat i tambe N.M.M. di 32 aña di edat, ámbos nasé na Kòrsou, komo sospechoso di e ladronisia ariba menshoná.

A konfiská e vehíkulo ku nan tabata aden pa mas investigashon, unda a transportá tantu e vehíkulo, komo e sospechosonan pa warda, unda a presentá e duo dilanti un Fiskal Ouksiliar, kende a ordená nan enkarselamentu pendiente di mas investigashon, den e kaso aki.