Ministerio Públiko ku mediashon penal

Ku presensia di Wiel Erens for di Hulanda pa lansa e proyekto

763
E presentashon ku tabatin ayera.
WILLEMSTAD—Ministerio Públiko (O.M.) di Kòrsou tin plan avansá pa próksimamente inisiá ku mediashon penal. Ta trata di un proyekto na unda un funshonario di mediashon ta intermediá i yega na un ‘kòntrakt’ entre un sospechoso i un víktima. Esaki pa evitá un persiguishon penal den Korte. Partidonan ta palabrá entre otro tokante pago di daño via Ministerio Públiko di daño ku por a ser sufrí. E palabrashon ta keda dokumentá den un kontrakt den kual partidonan ta terminá e problema.

E independensia di e siudadano ta na promé lugá. E partidonan mes ta yega na e kontenido di e akuerdo. Di e forma aki O.M. por hiba den un etapa preliminar un trayekto penal ku intervenshon signifikativo. Esaki ta úniko den persiguishon penal. Esaki ta trata di intervenshon ku kontenido.Mediashon penal por, segun O.M., un solushon pa kasonan den e esfera relashonal manera entre otro den problema di bisiña i formanan leve di violensia den kaso di menasa. E partidonan ta sera un akuerdo ku e resultado final ku e kaso no ta bai Korte.

Dado kaso ku partidonan no yega na un entedimiento, òf dado kaso un partido no ke partisipá den un mediashon penal, anto O.M. ta disidí ku e kaso lo keda persiguí i presentá probablemente den Korte.O.M. Kòrsou a atraé Wiel Erens pa lanta e proyekto pa mediashon penal. E ta mediador for di 1999 na Ministerio Públiko di Limburg na Hulanda. E ta bai, den kuadro di lansamentu di e proyekto, kompartí su eksperensia i konosementu ku koleganan di O.M. Kòrsou.

Den kuadro di tur esaki a tene un presentashon eksitoso ayera, pa vários stipuladó di maneho den e kadena hudisial i funshonarionan di Ministerio di Hustisia, Stichting Slachtofferhulp, Stichting Reclassering, Stichting Jeugdreclassering (AJJC), abogasia i miembronan di Korte Komun di Hustisia.