Willemstad—– E sospechoso Kuchi Guerrero mes a sera su mes i tambe mas hende despues di a sinta konta un kompañero den sel kon e matamentu na Campo Alegre mester a tuma lugá.E hòmber Kuchi Guerrero a keda arestá pa poseshon di un arma di kandela despues ku outoridatnan a bai na su kas den Cabo Verdeweg kual ta grens ku Kura Piedra i a hasi investigashon. Durante listramentu den su kas a bin topa ku un arma di kandela basta potente kual a keda konfiská. For di e dia su aresto e la ser manda pa e sèlnan di Polis na Barber na unda e la wòrdu enkarselá.

Einan e la wòrdu sera huntu ku un otro detenido kual tabata sera pa un kaso grandi. E sospechoso Guerrero kual a bin kue konfiansa ku e detenido ku tabata sera pa un kaso di asesinato a kuminsá kont’é tur loke e gang Army mester a forma parti di dje. Asina e sospechoso Guerrero mester a splika su kompañero di sel ku e tabata huntu ku e hòmber Bomba Cijntje i tambe dos otro hòmber mas di e gang Army di Kura Piedra i asina nan a bai Campo Alegre pa likidá e víktima Pulung Rosa. Einan durante bashamentu di bala otro dos hòmber mas ku tabata huntu ku Pulung tambe a bin pèrdè nan bida. Tambe  Guerrero mester a splika ku durante di e bashamentu di bala i kambiamentu di lachi di bala esun di Bomba mester a kita kai. Den e kaso aki tabata trata di un kashi di bala di e arma Glock. Enbèrdat Polisnan a bin topa ku un kashi di bala na e sitio kual a keda konfiská.

E sospechoso Guerero asta a splika kon e repartishon di sèn a tuma lugá i asta ken ta esun ku a vigilá Pulung for di nan tambú i a siguié bai  te Campo su tras. Esun ku a vigilá i tambe sigui e víktima Rosa ta un di esnan ku promé den e kaso di asesinato di Campo Alegre a keda arestá den e bario di Kierindongo Abou. Despues ku e detenido a sinta tende tur loke  e sospechoso Guerero a kont’é e la logra di drenta den kontakto ku un Fiskal kual ta esun mas temibel den e seno di Ministerio Públiko i a kont’é tur kos ku un proposishon pa mesora traslad’é pa Hulanda ya ku aki sigur su bida lo ta na peliger. Mesora a tuma su deklarashon pa despues a manda Kuchi Guerero pa prison debí  ku durante di un kontròl a bin topa ku telefon den su sel na Barber. Loke ku pone ku Fiskal a kere mas den e deklarashon di e detenido ku tabata sera huntu ku Kuchi ta e kashi di bala ku a ser papia di dje ya ku ta e polisnan so tabata sa ku a haña un kashi di bala ku a keda konfiská.

Entretantu e detenido ku a koperá ku Hustisia riba un djadumingu a ser manda pa Hulanda tal manera a palabra miéntras investigashon tabata kontinuá.  E investigashon a yega asina leu te ku despues ku Kuchi Guerrero a ser kondena pa poseshon di e arma outomátiko ku a bin hañ’é kuné den su poder e la ser arestá pa e kaso nobo kual tabata e kaso di tripel asesinato i òf kómplise na esaki. Seguidamente a detené e hòmber Bomba Cijntje tambe pa su posibel partisipashon den e mesun kaso aki. For di e dia ei mester a kuminsá protehá e sospechoso Kuchi Guerrero ya ku e la bin ta haña basta menasa i tabata teme pa su bida den prison. No mas ku siman pasa mester a bolbe sake for di e blòk na unda e tabata sera i bai kuné na un otro sitio alehá pa su mes seguridat. Sigur ta trata di un kaso delikado i outoridatnan ta hasiendo lo máksimo posibel pa trese e sospechosonan dilanti mesa bèrdè.