Jeancarlos i ‘Ziño’ a anotá pa Jong Colombia gana ‘Seru’

‘Pipi’ a haña rason !

390
Gol di 'Ziño'.
WILLEMSTAD—E dirigente di e ekipo saminero di Jong Colombia, Siegfried ‘Pipi’ Constancia a haña rason. Esaki despues di a deklará na Deporte Vigilante di ta sigur di un triunfo di su ekipo. Ta trata di deklarashon ku a keda publiká den e edishon di ayera.

Un ke otro den wega ku a reanudá e promé divishon di futbòl FFK, ayera den Stadion Antoine Maduro na Kintjan. Tabata un lucha entre e ekiponan mas abou riba e tabla di posishon, unda Jong Colombia ku tabatin 4 punto a enfrentá e ekipo di ‘Seru’, Hubentut Fortuna, ku a keda ku 3 punto.

Espacia tratando na bai laga Constancia.

Esaki despues ku e ekipo saminero, a logra triunfo ku skor di 2-0, den wega ku rèfri Arthur Gosepa a dirigí. Jeancarlos Torbed a habri e anotashon na di 29 minüt di e parti inisial di wega, pa seguidamente Gersinho ‘Ziño’ Constansia seya e triunfo den e parti komplementario di e wega, hungando na di 66 minüt di wega.

Sam Hye i Nadine Carolina, tabata esnan ku a asistí Gosepa ayera.

Samineronan selebrando despues di un gol.

Ku e resultado aki, Jong Colombia ta logra nan di dos triunfo siguí di temporada, serando 2017 i habriendo 2018 i ta bai empatá ku Centro Barber na di 7 lugá ku 7 punto, lagando tambe awor Victory Boys ku 5 punto i Hubentut Fortuna den sotano ku 3 punto, nan tras.