Terminando promé buèlta den segundo divishon ayera

Atomic i Indekor ta parti punto 1-1

191
Akshon durante di e wega.
WILLEMSTAD—E ekipo di área di bándabou, Atomic, dirigí pa Gilmar ‘Pik’ Pisas i e ekipo di Stanley Coffie, Indekor, supkampion di temporada tras di lomba den segundo divishon, despues di pèrdè den gran final na pinalti ku Jong Colombia, a hasi kos di ruman ayera nochi.

Esaki den e último partido di e promé buèlta di e aktual kampionato di futbòl FFK, bálido pa e segundo divishon. Tabata enkuentro ku a mira akshon riba tereno di FFK, na Brievengat, ku a keda dirigí pa rèfri Pedro de Sousa i a finalisá empatá na 1 gol pa banda. Rèfri de Sousa mester a saka 4 karchi hel, pa asina por a kontrolá su wega, di kual 2 pa ámbos ekipo.

Tekniko di Atomic, ‘Pik’ Pisas.

Oswin Luciano Jr. a anotá pa Indekor, miéntras ku pa Atomic, tabata Juwell Doran, ku a sòru pa nan anotashon.

Ku e resultado aki, Atomic ta laga Sithoc nan tras ku 10 punto i ta bai na di 5 puesto ku 11 punto. Indekor ta keda na di 7 puesto, tras di Sithoc, ku nan 9 puntonan. Esaki riba e tabla di posishon na final di e promé buèlta, despues ku tur ekipo a hunga 9 partido.

Tekniko Windster di Indekor.

Miéntras tantu e segundo buèlta lo inisiá riba djaluna dia 19 febrüari benidero, despues di un pouze di algun dia, relashoná ku marchanan di Karnaval 2018, na momentu ku pa 7’or di anochi C.H. Mahuma topa Sta Cruz, miéntras ku pa 9’or S.U.B.T. ta enfrentá New Song.