J-Drynne Isenia i Akram Potmis a gana proyekto ‘Flow i Manchester United’

“The Flow Ultimate Football Experience 2018”

457
E dos ganadonan.
WILLEMSTAD—Pa di 2 aña konsekutivo, Flow, Manchester United i FFK ta uni pa organisá “The Flow Ultimate Football Experience 2018”. Esaki a tuma lugá durante di e fin di siman ku ta tras di lomba, riba djasabra durante di oranan di mainta te ku mèrdia, riba tereno di FFK, na Brievengat.

E evento aki a brinda oportunidat na mas o ménos 40 hóben futbolista, kende nan ta militá den kampionato lokal hubenil, pa demostrá nan abilidatnan riba e área di futbòl.

E 40 hungadónan, di kategoria 12 pa 13 aña i tambe kategoria 14 pa 16 aña di edat, a keda repartí den diferente grupo i a keda evaluá dor di algun entrenadó lokal.

E hungadónan e keda evaluá a base di diferente abilidat manera entre otro nan abilidat di kòntròl di bala, abilidat di pasenan i tambe moveshonnan ku bala i hopi mas.

Na final di dia un hungadó di kada kategoria, kende tabatin e puntuashon di mas haltu, a resultá e 2 ganadónan. Ámbos lo bai ta representando nos isla próksimamente na Trinidad & Tobago.

Aya na Trinidad, nan lo tin un sekshon individual ku entrenadónan di CFU i Manchester United. Tambe nan lo kompetí ku e ganadónan di e otro paisnan partisipante, p’asina saka un ganadó. E ganadó, lo sigui pa London pa representá nos region durante e kompetensia internashonal.

E aña aki J-Drynne Isenia, miembro di e ekipo di Victory Boys, a resultá e ganadó den e kategoria di 12 pa 13 aña, miéntras ku Akram Potmis di e ekipo di Scherpenheuvel, a gana den kategoria pa partisipantenan di 14 pa 16 aña di edat, den The Flow Ultimate Football Experience 2018’.

Nan a risibí un bunita trofeo i algun regalo, miéntras ku tur demas partisipantenan tambe a haña un sèrtifikado i un bunita tas komo rekuerdo di nan partisipashon.

J-Drynne i Akram lo biaha otro luna pa Trinidat & Tobago kompañá pa un mayor i nan entrenadó.

Banda di e 2 ganadónan aki, FFK a anunsiá tambe di premia e partisipantenan femenino, kende a kompetí den e evento.

Lindsey Hart tabata e partisipante femenino ku e puntuashon mas haltu pa di 2 aña i e tambe lo haña un bunita regalo di parti FFK.