Remko Bicentini lo mira rumannan Martina den akshon

Tabata e intenshon pa mira Robertha tambe...

330
Nigel Robertha selebrando despues di anotá un gol.
HULANDA—E tékniko di nos selekshon nashonal di futbòl, Remko Bicentini, lo ta presente den stadion di Cambuur na Leeuwaarden djabièrnè próksimo.

Esaki pa asina presensiá un enkuentro bálido pa e kampionato di futbòl hulandes, pa loke ta Jupiler League. Lo bai ta e partido, unda e ekipo di Cambuur, hungando na kas, lo topa ku e ekipo di MVV for di Maastricht.

Durante di e enkuentro aki, e hóben atakante Nigel Robertha, kende a bin ta destaká enormemente den e último enkuentronan di su ekipo, lo mester tabata den akshon pa Cambuur, enfrentando e rumannan ohochi Shermar i Shermaine Martina huntu ku MVV.

Tabata e intenshon pa ta na Leeuwaarden, pa probechá 3 den 1, unda Bicentini lo a hasi uzo di e enkuentro aki, pa asina skout e trio i kisas tambe kombersá ku nan, ku bista riba refuersonan pa nos ekipo nashonal, pa ku nos próksimo kompromisonan, inisiando otro luna na Kòrsou, kontra Bolivia.

Esaki lamentablemente lo keda te na e duo formá pa e rumannan Martina, ku lo ta den akshon ku nan ekipo MVV. Un ke otro despues ku a bira konosí, ku Nigel Robertha ta leshoná i lo bai ta pa algun siman for di akshon. E peligrosisimo atakante a sufri un sker chikí na un múskulo di e parti ariba di su pia i ta for di akshon, pa ku su rekuperashon.