Lo kontrolá  di establesimentunan riba ruta di marchanan di karnaval

Polis lo pone atenshon i aktua firme kontra mal uso di bebida alkohóliko

6084
Polis tei pa seguridat pa tur hende durante Marchanan di karnaval
Willemstad—No ta permití tampoko pa uriná kantu di kaminda, riba asera, kontra edifisionan i na bista di públiko. Lokual bo bebe tambe mester sali bèk; pero “wildplassen” ta estriktamente prohibí, pues lo no tolerá esaki.

 

Riba e ruta lo tin diferente Porta Poti di kual por hasi uso.

No ta permití benta di bebida alkohóliko na menornan di edat.

No ta permití menornan tampoko pa bende òf sirbi bebida alkohóliko.

Ta prohibí benta di bebida den glas òf bòter di glas.

Empresarionan mester instruí òf kontrolá empleadonan severamente pa no sigui sirbi personanan ku ta bou di influensia di bebida alkohóliko.

Ta prohibí pa e empleado ehersé su trabou bou di influensia di kualkier supstansia òf otro kontenido alkohóliko òf konsumí bebida alkohóliko

Polis lo aktua firme i severamente

kontra personanan ku ta okashoná molèster pa otronan i/òf kometé un infrakshon di lei;

kontra personanan ku tin ophetonan prohibí i/òf ku por usa komo arma, arma blanku, òf arma di kandela;

riba instrukshon duná dor di Brantwer i Polis, den interes i mantenshon di órden públiko i seguridat di persona i propiedat/merkansia.

 Pa garantisá órden públiko i seguridat, pa nos siudadanonan i nos komunidat en general

Ta bon pa enfatisá ku polis, bou di niun sirkunstansia no ta aseptá niun klase di agreshon, insulto, intimidashon, menasa ni ofensa i resistensia den kumplimentu di su labor. Tur violensia, resistensia i opstakulisashon den realisashon di e trabou ku polis ta yamá pa hasi na bienestar di komunidat, lo keda kibrá ku violensia, semper kedando den e kuadro ku lei ta permití pa polis aktua. Semper ku e determinashon i firmesa nesesario, profeshonalismo i desensia.

“Aktua robes, sintié un bes!”

Kuerpo Polisial huntu ku Ministerio Públiko, den afan pa sòru pa òrdu públiko i seguridat keda garantisá durante di marchanan di Karnaval, sigur lo apliká e aña aki un bes mas e akshon “Aktua robes, sintié un bes”. Durante di e marchanan benidero lo bai aktua severo kontra bròmer, motosaikel, ‘quad’ èts. ku ta violá regla i leinan di tráfiko. E delitunan aki ta e.o.:

• ponementu di ‘fever’, rankamentu, hòpmentu;

• kore sin hèlmu (esaki no ta konta pa shofùr di ‘quad’);

• kore bròmer òf motosaikel sin karchi di kùr, reibeweis òf papel di seguro bálido, sin plachi di number òf ku esaki no ta sufisiente visibel;

• ekseso di zonido innesesariamente.

Ta supliká un i tur pa tuma bon nota di esaki.

Polis tei pa keda sirbi i protehá e komunidat aki dignamente ku rèspèt mutuo.