Bushiri Karting ta para riba cu su reglanan

123
ORANJESTAD,–Despues di a organisa un Leisure Kart Racing na Bushiri Karting -cu tabata un exito rotundo- na unda tur hende a sinti nan mes welcome na Bushiri Karting, algun persona a haya bon pa atacha y ataca e bon nomber di Bushiri Karting sin ningun motibo valido. Gerencia di Bushiri Karting ta lamenta e hecho aki y cu e personanan aki ta purba di trece Bushiri Karting den un luz negativo.

E meta di Leisure Kart Racing ta hustamente pa engrandece e deporte di karting bek na Aruba. Management ta sospecha cu e motibo cu algun persona a dicidi di post algun opinion negativo riba Bushiri Karting ta pa motibo cu management a tuma algun medida – entro otro despues di a haya diferente keho di clientenan- contra personanan cu tabata kere cu nan no mester mantene nan mes na reglanan di Bushiri Karting.

Pa ilustra un ehempel, keda sin paga e contribucion acorda cu Bushiri Karting. Enbes cu e personanan aki a apoya e organisacion di e evenemento aki, awor kier tuma un posicion di ta “wrong and strong” door di trata na trece Bushiri Karting den un luz negativo.

Management di Bushiri Karting tin como meta pa e deporte di karting aki na Aruba bira popular y sano, es decir un deporte na unda tur hende ta sinti nan mes welcome. Bushiri Karting no lo tolera cu un grupo, cu tabata zorg directamente y/of indirectamente pa un mal atmosfera y cu riba dje no tabata mantene su mes na e reglanan stipula, ta afecta e sintimento aki.

Bushiri Karting actualmente ta bezig cu un restructuracion pa desaroya e deporte di karting den un deporte na Aruba na unda tur hende ta bon bini atrobe pa asina famianan por bin y gosa di un momento ameno den un bon ambiente. Boso keda pendiente como cu pronto lo anuncia otro evenementonan cu lo ta organisa pa Bushiri Karting y otro plannan cu lo bay bin cun’e; entre otro pone mas categoria den tur careda pa asina haci Bushiri Karting un luga na unda tur hende ta sinti nan mes welcome y pa asina engrandece e deporte di karting na Aruba. Alabes ta añadi como anexo un sentencia cu Bushiri Karting a gana recientemente den un caso na corte na unda Corte di Prome Instancia a confirma cu e maneho cu Bushiri Karting ta hiba ta corecto.