Empresa di construccion ta desea pa reuni cu Minister Glenbert Croes

158
ORANJESTAD,–E empresa di construccion Azure, tabata reuniendo cu gobierno, pidiendo e extensionnan di trabao di e estadia riba e isla, ya cu nan no tabata tin e permiso ainda di DPL. Nan tabata pidiendo extension di e personanan, pasobra nan no ta cobra na Aruba. Nan ta trahadonan cu ta cobra na Venezuela. Ta trahadonan cu e empresa ta duna tur cos akinan. Nan ta trahadonan, pasobra independientemente, mester yama nan trahado, segun Antonio Azzariti.

E ingenieronan den servicio di e compania, ta supervisor. E ingenieronan ey no ta haciendo e trabao directo, contrario di loke nan a contrata e contratistanan local pa haci dicho trabaonan ey. Ta un serie di specialista cu ta esnan cu ta encarga pa dirigi den cada un di e ramanan aki. Riba e dia cu a bay cu e personanan, mayoria di e specialistanan aki a caba di recoge, mirando cu e proyecto a wordo paralisa pa Citgo.

Te asina leu, e empresa aki tambe tin combersacion cu Citgo, mirando cu nan tin cuestionnan pendiente y hopi otro cos pa aclarea, pasobra ta esunnan di mas importante.

 

Reunion cu Gobierno y sindicato
Minister Glenbert Croes nunca a reuni cu Azure y nunca a pidi pa reuni cu nan. E empresa a pidi pa reuni cu varios minister, incluyendo Glenbert Croes. Te awor aki no a haya respuesta y nan lo ta desea pa atende e empresa di manera pa combersa cu nan y mira nan transparencia.

Cuanto hende trahando den mancamp
A cuminsa na Juli di aña pasa, cu un tiki mas di 95 persona, cual nan a mantene. Tin hopi hende cu ta personanan administrativo, parti di logistica. No tur di nan ta na Aruba. Tin hopi hende cu ta na e parti matris na Venezuela.

Con leu e mancamp ta
E mancamp, despues di a haci un recorido hunto cu personal di Citgo, ta 95 pa 97% cla. Por bisa esey cu un garantia. E obra aki, tur loke falta ta 3 siman mas pa e wordo conclui.

Bon relacion
Azzariti a splica cu nan no a haya placa ainda di Citgo, pero nan ta trahando riba esey. Di e 95%, nan a ricibi menos di e mita di e porcentahe di pago. Esey ta nifica cu nan ta den un 50% di debe. Nan tin speransa cu nan tin cu cumpli y honra e debe cu Citgo tin cu nan. No kier bisa cu nan lo no cumpli, Azzariti a splica. Nan speransa semper ta cu nan tin cu cumpli cu e contract cu Citgo mes a honra.

Contacto cu Citgo
Semper tabata tin bon contacto cu Citgo. Tanto cu tur e reunionnan di avanse ta wordo haci na e campamento mes.

Kico lo bay pasa
Awor aki, segun Azzariti, nan a ricibi un comunicado di Citgo, unda cu nan ta demobilisacion y paralisacion di e campamento. E campamento awor aki ta paralisa. Di dia Warda nos Costa a bin, e trabaonan a para. Ta p’esey esnan cu tabata tey, ta e ingenieronan supervisor cu tabata haciendo cada un di e detayenan pa entrega na Citgo, pasobra nan a ordo e paralisacion. Awor aki nan ta den e plan di demobilisacion. E campamento ta wordo demobilisa. Loke falta ta caba cu e parti comercial cu Citgo.

Trabao
No tabata tin hende cu tabata acerca nan pa trabao. Di parti di e expatriadonan, ta esnan cu tabata tey di aña pasa. Nunca nan a pasa un tempo sin cumpli cu e tempa reglamentario riba e isla. Tur hende cu a bay ainda tabata riba e tempo reglamenta riba e isla. Nan no tabata ilegal. Ilegal ta esnan cu ta pasa e tempo rekeri y cu no tin un extension. Pa e compania, tur tabata tin e tempo rekeri y e extensionnan aproba.

Disgusta
Azzariti a splica cu e ta sinti cu ta algo politico, cual tema nan no ta maneha. Nan no ta compronde, pero si sa cu ta algo politico. Nan ta compronde tur cos di construccion so. Nan ta lamenta loke a sosode, pero loke Azzariti kier pa gobierno ta, cu nan ta un empresa cu nan a bin cu intensionnan bon cla pa bin inverti y sigui inverti na Aruba. Nan no a perde speransa. Esey ta lo mas importante. Nan animo pa por inverti na Aruba, ta sigui latente y ta spera cu esnan di gobierno, yama of sinta cu nan y mira kico ta nan intencion.