Un viktoria i dos empate

Curfutsal a kontinuá den fin di siman ku diferente enkuentro

222
Akshon di enkuentro di Curfutsal den fin di siman.
SUFFISANT – Manera ta konosí, e kampionato di futbòl di sala, ouspisiá pa Curfutsal, a ranka sali djaweps último i a kontinuá den fin di siman tras di lomba.

Ta asina ku djasabra último pa 19.00 tabata e ekiponan di FC Five Stars i FC Bandolina ku a enfrentá otro riba kancha di e sala Niels Liberia, ku ta situá den e stadion Odulio ‘Du’ Willems na Suffisant. Tabata un enkuentro bon bringá den e promé mitar ku ta bai sosegá ku e skor 0-0. Den e di dos mitar ámbos ekipo su mashin di gol ta start i entre nan dos ta anotá un total di ocho gol i e enkuentro ta finalisá den un empate 4-4.

Seguidamente pa 20.00 tabata e ekipo di FC Ocean View Elite ku ta enfrentá e ekipo di FC Securitas Antias i tabata e ekipo di Securitas Antias ku ta bai ariba 2-0 for di den e promé mitar i den e di dos mitar tabata e ekipo di Ocean View Elite ku ta trata na bin bèk ku dos gol, pero e ekipo di FC Securitas Antias ta anotá dos gol mas pa logra e viktoria ku skor di 4-2.

Den e último enkuentro di djasabra ku a kuminsá 21.00, tabata e ekipo di FC RO Family ku ta enfrentá e ekipo di FC IGA i e enkuentro aki ta finalisá den un empate na dos gol. Ambos ekipo a anotá den e promé mitar i den di dos mitar e enkuentro no a konosé anotashon. E kampionato ta kontinuá djaweps awor den sala Niels Liberia ku 3 enkuentro.