Mas éksito pa nos studiante/atletanan na Merka:

Xiarysse Emerenciana a keda nombrá “Player of the Week”

270
Xiarysse Emerenciana a keda nombra “Player of the Week” pa Florida Tech.
FLORIDA – Un biaha mas nos atleta /studiantenan na Merka ta sigui marka historia i pone Kòrsou su nòmber den tòp. Sigur ta un orguyo pa nos aki na Kòrsou, kada bes di nobo, ora ku nos tende ku un di nos hóbennan a resaltá den kual sea e deporte ku nan ta práktika i òf estudio ku nan ta studiando.

E siman tras di lomba un biaha mas tabata e kaso pa nos ta super orguyoso di nos hóbennan ku ta studiando i hasiendo deporte na Merka. Tabata durante di e siman tras di lomba ku e hóben sòfbolista Xiarysse Emerenciana ta keda nombrá komo “Player of the Week” pa su skol Florida Tech (FiT). Xiarysse ta un di e ehèmpelnan dikon High School ta bon pa nos hóbennan di Kòrsou. Xiarysse, kende aki na Merka tin e apodo  “Twins”, tabata studiante na MIL i despues a bini Merka i a bishita Trinity Christian Academy.

Xiarysse i su ruman Shanysse ta miembronan di e ekipo di sòftbòl Pichingolo i ta pupilonan di Coach Taffy de Jongh i su staf tékniko. Estando na Merka, Xiarysse tabata parti di e grupo ku bou di liderazgo di Coach Phillbert LLewellyn, ku na 2014 a keda nombrá ‘coach of the year’, a logra hasi di Trinity Christian Academy (TCA) e High School number un den sòftbòl di e estado di Florida pa loke ta ‘small schools’ i number kuater rankiá pa ‘all schools’.

Di TCA, Xiarysse huntu ku su ruman Shanysse Emerenciana, nan a sigui pa Palm Beach State College ku un ‘Full Scholarschp’ i a gradua pa nan ‘Associate’ einan. Manera grandinan ta bisa, esta ku “trabou duru i dedikashon ta paga”, den nan kaso esei tabata bèrdat ora ku Florida Tech a duna nan un ‘Super Scholarschip’ pa por kontinuá nan estudio kombiná ku nan deporte. Pabien na “Twins” i sigui hasi nos orguyoso.